Ўзбекистон президентининг фармони билан Баҳодир Ҳамидович Тошматов Миллий гвардия қўмондони лавозимига тайинланди, деб хабар берди давлат раҳбари матбуот котиби Шерзод Асадов.
У бунгача президент ҳузуридаги Хавфсизлик кенгаши котибининг ўринбосари лавозимида ишлаб келаётган эди.
2020 йил 16 мартдан буён Рустам Мирзаевич Жўраев Миллий гвардия қўмондони сифатида хизмат қилиб келаётган эди.
Баҳодир Тошматов ҳақида
Баҳодир Тошматов (1964 йилда туғилган) Тошкент олий умумқўшин қўмондонлик билим юртини, Ўзбекистон Қуролли Кучлари академиясини, Россия Қуролли Кучлари Бош штаби Ҳарбий академиясининг Олий академик курсларини, шунингдек, Фарғона давлат университетини тамомлаган. Ҳарбий фанлар бўйича фалсафа доктори, доцент.
Туркистон ҳарбий округи қўшинларида қўмондонлик таркибининг турли лавозимларида хизмат қилган. 1992—1999 йилларда Мудофаа вазирлигида раҳбарлик лавозимларида, 1999—2008 йилларда Мудофаа вазирлиги ҳарбий округлари қўшинларига қўмондонлик қилган.
2008 йилдан 2011 йилгача мудофаа вазирининг ўринбосари ва биринчи ўринбосари, сўнгра 2011 йилдан 2013 йилгача президент ҳузуридаги Миллий хавфсизлик кенгаши котиби бўлиб ишлаган. 2013 йилдан 2017 йилгача мудофаа вазирининг биринчи ўринбосари бўлган.
2017—2020 йилларда ҳам Миллий гвардия қўмондони бўлиб хизмат қилган. 2020 йилнинг мартидан октябригача президент давлат хавфсизлик хизмати (ПДХХ) раиси бўлган, шундан сўнг Хавфсизлик кенгаши котиби ўринбосари этиб тайинланган эди.