Ўзбекистонда 53 триллион сўмлик талон-торожлик ва молиявий хатоликлар аниқланди, коррупциявий схемалардан келган зарар эса 4,2 триллион сўмни ташкил этди. Бу ҳақда 2026 йил 27 январь куни бўлиб ўтган йиғилишда президент Шавкат Мирзиёев маълум қилди.
«Эслаб қолинг: давлат маблағларининг ҳар бир сўми қатъий назоратга олинади. Жавобгарлик муқаррар, жазо эса қаттиқ бўлади!» — деб таъкидлади у.
Давлат раҳбарининг сўзларига кўра, сўнгги вақтларда Президент администрацияси ва давлат органларида жорий этилган комплаенс ҳамда коррупцияга қарши назорат тизими жиддий қонунбузилишларни аниқлаш имконини берган: бюджет тушумлари, талон-торожликлар ва молиявий суиистеъмолликлар бўйича 53 триллион сўмлик, ташқи савдо операциялари бўйича эса 8 миллиард доллардан ортиқ қарздорлик аниқланган.
Коррупциявий схемаларга қарши кураш доирасида 4,2 триллион сўмлик зарар белгиланди, шундан ҳозиргача 1,3 триллион сўми ундирилди. Ушбу фактлар бўйича 55 киши қўлга олинган. Президент мисол тариқасида Ички ишлар вазирлиги тизимидаги вазиятни келтириб ўтди, у ерда давлат харидларида 186 миллиард сўмлик бюджет маблағлари ўзлаштирилгани аниқланган.
У ички ишлар вазирининг собиқ ўринбосари — Жамоат хавфсизлиги департаменти (ЖХД) бошлиғи генерал-майор Бекмурод Абдуллаев ва Жазони ижро этиш департаменти собиқ бошлиғи Рустам Турсуновга нисбатан жиноят иши қўзғатилганини тасдиқлади.
Давлат раҳбари давлат органлари ва корхоналарида хавфсизлик масалалари учун масъул бўлган мансабдор шахслар фаолиятини танқидий қайта кўриб чиқиш вақти келганини қайд этди. Шавкат Мирзиёев ҳуқуқни муҳофаза қилиш тизимида хизмат қилишнинг чекланган ёши — полковниклар учун 55 ёш, генераллар учун 60 ёш этиб белгиланганига қарамай, ҳозирда ушбу ёшдан ошган 300 дан ортиқ ходим раҳбарлик лавозимларини эгаллаб келаётганини кўрсатиб ўтди. Шу билан бирга, Фавқулодда вазиятлар вазирлиги тизимида барча раҳбар кадрлар 50 ёшдан кичик.
«Бизга профессионал лаёқати ва талабчанлиги юқори бўлган ёш раҳбарлар корпуси керак», — деди президент.
У раҳбарлик лавозимларига ёш кадрларни тайинлаш, шунингдек, пенсия ёшидаги ходимларнинг тажрибасидан маслаҳатчи ва ўқитувчи сифатида фойдаланиш ёки жойларда ёшлар билан ишлаш учун устоз-шогирд тизимини яратиш муҳимлигини таъкидлади.
Президент йиғилишда Давлат активларини бошқариш агентлиги ва «Ўзбекнефтгаз»да ҳам кенг кўламли текширувлар ўтказилаётгани, у ерда миллиардлаб сўмлик талон-торожликлар аниқланганини айтди. Давлат активлари агентлиги раҳбари ишдан олинди. ДХХ ва Комплаенс хизмати тафтиш ишларини бошламоқда. Терговга иқтисодий хавфсизлик бўйича мутахассислар жалб этилган.