Президентнинг ташқи сиёсат масалалари бўйича маслаҳатчиси Абдулазиз Комилов «O‘zbekiston 24» телеканалига Ўзбекистоннинг Тинчлик кенгашига қўшилиш сабаблари ва ушбу ташаббус доирасидаги мамлакат манфаатлари ҳақида гапириб берди.
Унинг сўзларига кўра, қарор биринчи навбатда хавфсизлик нуқтаи назаридан, шунингдек, кенгаш вазифалари Ўзбекистон ташқи сиёсатининг устувор йўналишларига мос келгани учун қабул қилинган.
«Иқтисодий форум кун тартибида сиёсий масалалар кўп. Улардан бири — Ғазо секторидаги ҳарбий-иқтисодий инқироз ва уни ҳал қилиш йўлларини излашдир. Айнан шундай мақсад қўйилган эди ва яқинда Дональд Трамп Тинчлик кенгашини тузиш ташаббуси билан чиқди. Бу кенгашнинг асосий вазифаси — биринчи навбатда Ғазодаги инқирозни тартибга солиш», — деди Комилов.
«Бизнинг ҳаётий муҳим манфаатларимиз бор»
Нима учун Ўзбекистон ушбу ташаббусни қўллаб-қувватлади, деган саволга жавоб берар экан, Комилов мамлакат президенти Шавкат Мирзиёев АҚШ президенти Дональд Трампнинг таклифини қабул қилганини, чунки у миллий манфаатларга жавоб беришини таъкидлади.
«Савол туғилади: нима учун биз бу ташаббусни қўллаб-қувватладик? Биринчидан, хавфсизлик нуқтаи назаридан бизнинг, шубҳасиз, ўз манфаатларимиз бор. Иккинчидан, кенгаш олдида турган вазифа ва мақсадлар ташқи сиёсатимизнинг асосий тамойилларига тўлиқ мос келади ва ҳамоҳанг. Учинчидан, ушбу минтақада бизнинг ҳақиқатан ҳам жиддий ҳаётий муҳим манфаатларимиз бор», — деди.
Унинг айтишича, Ўзбекистоннинг «ҳаётий муҳим манфаатлари» минтақавий, глобал ва миллий хавфсизликни таъминлаш билан боғлиқ.
Маслаҳатчи Ўзбекистон Яқин Шарқ минтақасига, жумладан, экстремизм билан боғлиқ хавфлар туфайли ҳам эътибор қаратаётганини таъкидлади.
«Ўзбекистон фуқаролари минтақадаги экстремистик оқимлар, ташкилотлар ва гуруҳларга қўшилиб, сўнг мамлакатга қайтиб, муаммолар туғдиришга ҳаракат қилишган. Аммо давлат уларнинг қайтишини таъминлади ва ижтимоий реабилитация ҳамда янги ҳаёт бошлашлари учун шароит яратди», — деб қайд этди Комилов.
Унинг сўзларига кўра, бундай ёндашув Бирлашган Миллатлар Ташкилоти томонидан юқори баҳоланган.
«Бундай инсонпарвар ёндашув БМТ раҳбарияти томонидан жуда юқори баҳоланди ва уларнинг фикрича, президентимизнинг сиёсати бутун дунё учун намуна бўлиб хизмат қилиши мумкин. Шу боис айтишимиз мумкинки, Ўзбекистоннинг бошқа давлатлар қатори ушбу минтақада манфаатлари бор ва уларнинг энг асосийси — ўз хавфсизлигини таъминлаш», — деди.
Яқин Шарқ ва Афғонистон
Комилов, шунингдек, Яқин Шарқдаги вазиятни қўшни Афғонистондаги хавфсизлик билан боғлади.
«Агар қўшнимиз Афғонистонни олсак, у ерда ҳужумлар бошлангунга қадар ҳеч қандай экстремистик ва террористик ташкилотлар бўлмаган. Аммо уруш бошлангач, бу каби гуруҳлар қаердан пайдо бўлди? Улар Яқин Шарқдан келишди», — деди.
Унинг фикрича, вазиятни тартибга солиш учун халқаро ҳамжамиятнинг биргаликдаги иштироки зарур.
«Бу масалани ҳал қилиш учун бутун халқаро ҳамжамият бирлашиши ва биргаликда ҳаракат қилиши керак — нафақат АҚШ, араб ва мусулмон давлатлари, балки Марказий Осиё давлатлари ҳам. Агар пухта ўйланган ҳолда, қадам-бақадам тинчлик ва барқарорлик ўрнатишга эришилса, бу жуда муҳим ютуқ бўлади», — дея таъкидлади Комилов.
«Ўзбекистоннинг халқаро майдонда тан олиниши»
Алоҳида равишда маслаҳатчи Ўзбекистоннинг саммитдаги иштирокининг рамзий аҳамиятини қайд этди.
«Бу, биринчидан, жуда муҳим сиёсий тадбир. Иккинчидан, бу Ўзбекистонга нисбатан ишонч, ҳурмат ва уни халқаро майдондаги жиддий иштирокчи сифатида тан олинишининг ифодаси», — деди.
Эслатиб ўтамиз, 2026 йил 22 январь куни Ўзбекистон президенти Шавкат Мирзиёев АҚШ президенти Дональд Трамп билан Тинчлик кенгаши тўғрисидаги келишувни имзолаган эди. Маросим Давосда Жаҳон иқтисодий форуми доирасида Яқин Шарқ ва Жанубий Америка мамлакатлари, шунингдек, бир қатор Европа ва Жанубий Кавказ давлатлари вакиллари иштирокида бўлиб ўтди.