Ўзбекистон президенти Шавкат Мирзиёев 2026 йил 22 январь куни Давосда АҚШ президенти Дональд Трамп ташаббуси билан ташкил этилган Тинчлик кенгаши низомини имзолади. Маросим Оқ уйнинг YouTube-канали орқали трансляция қилинди.
Маросим давомида таъсисчи давлатлар вакиллари икки кишидан бўлиб Америка президенти ҳузурига янги ташкилот низомини имзолаш учун чиқишди. Тадбирда Яқин Шарқ ва Жанубий Америка мамлакатлари (Саудия Арабистони, Қатар, БАА, Аргентина, Парагвай) раҳбарлари, шунингдек, Венгрия бош вазири Виктор Орбан, Арманистон бош вазири Никол Пашинян, Озарбайжон президенти Илҳом Алиев ва Қозоғистон президенти Қасим-Жомарт Тоқаев иштирок этди.
«Тинчлик кенгашининг ташкил этилиши Ўзбекистоннинг тинчлик ташаббуслари ва кўп томонлама ҳамкорликни қўллаб-қувватлашга қаратилган ташқи сиёсий устувор йўналишларига мос келади. Янги тузилма БМТ Хавфсизлик Кенгаши резолюцияси билан қўллаб-қувватланган Ғазо секторидаги можарони тўхтатиш бўйича Комплекс режани амалга ошириш доирасида шакллантирилмоқда», — деб хабар берди Ўзбекистон президенти матбуот хизмати.
«Тинчлик кенгаши эскалация хавфини камайтириш, Ғазо секторини иқтисодий ва ижтимоий тиклаш учун қулай муҳит яратишга хизмат қилади. Иқтисодиёти гуллаб-яшнаган, тинч ҳаёт ҳукм сурган ва Фаластин давлатини барпо этиш истиқболига эга бўлган Янги Ғазони қуриш имконияти пайдо бўлмоқда», — дейилади хабарда.
«Кенгашнинг низом ҳужжатини имзолаш орқали Ўзбекистон унинг таъсисчи давлатларидан бирига айланди. Бу мамлакатимизнинг кенгаш ишида изчил иштирок этишга ва унинг мандатини амалга оширишга барча таъсисчи давлатлар ҳамда халқаро шериклар билан яқин ҳамкорликда амалий ҳисса қўшишга тайёрлигини англатади», — дея қўшимча қилди матбуот хизмати.
Тадбирда, шунингдек, Озарбайжон, Арманистон, Аргентина, Баҳрайн, Болгария, Венгрия, Индонезия, Иордания, Қозоғистон, Қатар, Марокаш, Моғулистон, Парагвай, Покистон, Саудия Арабистони, Туркия ва бошқа мамлакатлар давлат раҳбарлари, бош вазирлари ва ташқи ишлар вазирлари қатнашди. CNN нашрининг қайд этишича, улар орасида АҚШнинг анъанавий ғарбий европалик иттифоқчилари бўлмаган.
«Бу шунчаки «Тинчлик кенгаши» эмас, бу ҳаракатлар кенгаши. Бу муваффақиятли ташаббус бўлади ва бугун сиз буни турли ўтмишга эга ва дунёнинг турли нуқталаридан келган давлатлар иштирокида кўриб турибсиз», — деди АҚШ давлат котиби Марко Рубио имзолаш маросимидан кейинги қисқа нутқида.
Дональд Трамп Тинчлик кенгаши БМТ билан ҳамкорликда ишлашини хоҳлашини айтди: «Ушбу кенгаш тўлиқ шаклланиши билан биз амалда хоҳлаган ишимизни қила оламиз ва буни Бирлашган Миллатлар Ташкилоти билан биргаликда амалга оширамиз. Мен доим БМТнинг салоҳияти улкан эканини айтганман. Ундан фойдаланилмади, лекин салоҳият ҳақиқатан ҳам жуда катта».
Тинчлик кенгашининг биринчи раиси Дональд Трамп бўлади. У ерга кимни таклиф қилишни у шахсан ўзи ҳал қилади. Қарорлар кўпчилик овоз билан қабул қилинади (бир давлат — бир овоз), лекин уларнинг барчаси раис томонидан тасдиқланиши керак бўлади.
АҚШ маъмурияти вакилларининг сўзларига кўра, 35 га яқин давлат қўшилишга розилик берган, яна 60 таси таклифнома олган.