2026 йил 20 январь куни Тошкентдаги велосипедчилар, роллерлар ва скейтеpлар ҳукуматга видеомурожаат йўллаб, «Мовий гумбазлар» боғида тугатилган скейт-майдончани қайта тиклашни сўрашди.
Бу ерда бутун бошли экстремал маданият шаклланган эди. Биз уни ўз вақтимиз ва маблағимизни сарфлаб яратганмиз. Бу биз ўзимизни эркин ҳис қиладиган ва севган ишимиз билан шуғулланадиган маскан эди. Бугун эса бу боғ йўқ. Рампалар бузиб ташланди, жой бетонлаб ташланди. Бу ерда нима қурилиши ва бу қандай асосда қилинаётганини ҳеч ким тушунтирмади. Ваҳоланки, 2025 йил 1 январдан спорт ҳудудларини хусусийлаштиришни тақиқловчи қонун кучга кирган. Ушбу ҳаракатларнинг қонунийлигини текширишни сўраймиз, дейди спортчилар.
2024 йил июнь ойида майдончани болалар аттракционлари «эгаллаб» олишга уринган эди. Яккасарой тумани ҳокимлиги ўшанда аттракционлар ўрнатишга рухсат бермаганини айтган бўлса-да, спортчиларнинг сўзларига кўра, вазият тўлиқ ҳал бўлмаган.
Роллер Дилнурнинг сўзларига кўра, вақт ўтиши билан тўлақонли скейт-паркдан фақат 4-5 та рампа қолган, қолган ҳудуддан эса аттракционлар учун фойдаланилган. Шу билан бирга, майдончанинг ҳолатини спортчиларнинг ўзларидан бошқа ҳеч ким назорат қилмаган. Ёмғирлар туфайли фанералар яроқсиз ҳолга келиб қолган, йигитлар ҳар бир совуқ мавсумдан кейин скейт-парк элементларини ўз ҳисобларидан таъмирлашган.
Велосипедчилар Данил Халимов ва Богдан Якимовнинг айтишича, сўнгги рампалар 2025 йил октябрь ойида кесиб ташланган ва олиб чиқиб кетилган. Ўшандан бери ҳудудда махсус техника ишлаб, коммуникация тармоқларини ётқизган.
Бир куни келсак, одатий жойимиз ўрнида бетонни кўрдик. Бу янги скейт-майдонча учун тайёргарликка ўхшамасди: ер сатҳи анча кўтарилган, ҳудуд эса арматуралар билан тўлдирилган эди, дея давом этади Дилнур.
«Мовий гумбазлар»даги майдонча ёпилгач, спортчилар муқобил жой излашга мажбур бўлишди. Аксарият райдерлар Анҳор бўйидаги кўприк остида жойлашган скейт-паркка кўчишди. Бироқ Богдан Якимовнинг таъкидлашича, бу вақтинчалик чора, чунки у ерда жой етарли эмас, айниқса велосипедчилар учун.
Спортчиларнинг фикрича, скейт-паркнинг ёпилиши барча доимий ташриф буюрувчиларнинг норозилигига сабаб бўлган. Муаммо ҳудуднинг келажагини белгилашдаги ёндашувда, деб ҳисоблашади улар.
Шу ерда учадиган одамлар билан гаплашиш керак эди… Шунчаки бузиб ташлаб, ўзиникини қуриш эмас, деб таъкидлайди велосипедчи.
Янги скейт-парк келажаги ҳақида гапирганда, Якимов агар тўғри бошқарилса ва райдерлар фикри инобатга олинса, бу ерда сифатли майдонча яратиш мумкинлигини айтди. Бунга жойнинг шаҳар марказида экани ва жамоат транспорти қулайлиги ҳам имкон беради.
Ёшларнинг мурожаатидан сўнг, шаҳар ҳокимлиги матбуот хизмати эски скейт-майдонча ўрнида Капитал қурилиш бошқармаси буюртмасига асосан янгиси қурилишини, шунингдек, падел-теннис корти қўшилишини маълум қилди. Теннис корти пуллик, скейт-паркдан фойдаланиш эса бепул бўлади. Бироқ майдончанинг ҳажми аввалгидан сезиларли даражада кичикроқ бўлиши кутилмоқда.
Аҳоли билан мулоқотнинг йўқлиги
Муҳим қарорлар қабул қилишда шаҳарликлар ва жамоат жойларининг фаол фойдаланувчилари билан мулоқот қилмаслиги тез-тез кузатиладиган ҳолатга айланди. Кўпинча қарорлар фақат ижтимоий тармоқлардаги кескин норозиликлардан кейингина қайта кўриб чиқилади ёки бекор қилинади.
2021 йил бошида «Мовий гумбазлар» боғида Мустақиллик стеласини қуриш режаси аҳолининг кучли эътирозларига сабаб бўлган эди. Ўшанда стела қурилишига қарши мурожаатни 15 мингга яқин киши имзолаган, натижада лойиҳа бекор қилиниб, мажмуани «Янги Ўзбекистон» боғида қуришга қарор қилинган эди.