Сеул марказий туман суди мамлакат собиқ бош вазири Хан Док Суни 2024 йилда ҳарбий ҳолат жорий этилиши билан боғлиқ исён иши бўйича 23 йилга озодликдан маҳрум қилди, деб хабар бермоқда Yonhap.
2024 йил декабрь ойида ўша пайтдаги президент Юн Сок Ёль конституцияга зид равишда ҳарбий ҳолат эълон қилган эди. Кейинчалик унга нисбатан импичмент эълон қилинди. Хан Док Су ўша вақтда бош вазир лавозимини эгаллаб турган, Юн Сок Ёль ҳокимиятдан четлатилганидан кейин эса вақтинча президент вазифасини бажарувчи бўлган эди.
Хан Док Су исён ташкилотчиси бўлган Юн Сок Ёлга кўмаклашиш, исёнда «асосий роль» ўйнаш ва ёлғон гувоҳлик беришда айбдор деб топилди. Прокуратура у учун 15 йил қамоқ жазосини сўраган эди. Собиқ бош вазир суд залида қамоққа олинди.
«Судланувчи демократик легитимлик ва унинг учун масъулият юкланган бош вазир сифатида Конституция ва қонунларга амал қилишга мажбур эди… Шунга қарамай, у 3 декабрдаги исён муваффақиятли якунланиши мумкин деб ҳисоблаб, ушбу мажбурият ва масъулиятни эътиборсиз қолдирди», — деди судья ҳукмни эълон қилиш чоғида.
«3 декабрдаги исён пайтида ҳеч ким ҳалок бўлмагани ва исённинг ўзи бир неча соат ичида тугаганига қарамай, бу ҳарбий ҳолат жорий этишда қатнашган қуролли қўшинларга қарши қуролсиз чиққан ва Миллий ассамблеяни [парламентни] ҳимоя қилган одамларнинг жасорати натижаси бўлди», — деди судья. У қонун чиқарувчиларнинг ҳарбий ҳолат тўғрисидаги фармонга қарши овоз беришига тўсқинлик қилиш учун юборилган ҳарбийларни парламент биносига ўтказмаслик мақсадида етиб келган депутатлар ва оддий фуқароларни назарда тутди.
Собиқ бош вазир айбловларни рад этиб, ҳарбий ҳолат жорий этиш режаларидан хабари бўлмаганини, бунга ҳеч қачон розилик бермаганини ва унинг жорий этилишига кўмаклашмаганини даъво қилди.
Хан — Юн Сок Ёль кабинетининг парламентдаги овоз беришдан бир неча соат ўтиб бекор қилинган ҳарбий ҳолат жорий этишга уриниш учун ҳукм қилинган биринчи аъзоси.
Суд ҳукми ҳарбий ҳолат эълон қилиниши ва ундан кейинги ҳаракатлар исён эканини тасдиқлади, деб ёзади Yonhap. Агентликнинг фикрича, ушбу қарор исён ташкил этишда айбланаётган Юн Сок Ёлга нисбатан чиқариладиган ҳукмга таъсир қилиши мумкин. Прокуратура у учун ўлим жазосини сўраган. Узил-кесил қарор 2026 йил 19 февраль куни эълон қилинади.