Навоий вилоятининг Хатирчи туманида ота йиғлаётган беш ойлик фарзандининг оғзига пайпоқ тиқиб қўйди. Гўдак кейинчалик вафот этди, деб хабар берди «Севимли» телеканалининг «Замон» кўрсатуви.
Репортажда айтилишича, бола нафас қисилишидан кўкариб кетган. Онаси уни зудлик билан шифохонага олиб борган. Шифокорларнинг саъй-ҳаракатларига қарамай, у тўрт кундан кейин вафот этган.
Шифокор Урал Раҳматуллаевнинг сўзларига кўра, бола шифохонага 2026 йил 10 январь куни ярим тунда олиб келинган. У клиник ўлим ҳолатида бўлган — юрак уриши ва нафас олиши тўхтаган. Шифокорлар юрак-ўпка реанимациясини ўтказишгач, юрак қайта ура бошлаган. Реанимацияда ўтган тўрт кундан кейин, 14 январь куни соат 22:00 атрофида биологик ўлим қайд этилган.
Маҳалла вакилларининг маълум қилишича, бу эркакнинг иккинчи оиласи бўлиб, унда икки нафар ўғил фарзанди бўлган. Уларнинг сўзларига кўра, у биринчи оиласидаги фарзандларига (қиз ва ўғил) нисбатан ҳам зўравонлик ишлатган. Маҳалла «еттилиги» у билан мунтазам равишда профилактик суҳбатлар ўтказиб келган.
Гумонланувчига нисбатан Ўзбекистон Жиноят кодексининг 104-моддаси (Қасддан баданга оғир шикаст етказиш натижасида ўлим келиб чиқиши) билан жиноят иши қўзғатилган ва у ҳибсга олинган. Ушбу модда бўйича эркакка саккиз йилдан ўн йилгача озодликдан маҳрум қилиш жазоси берилиши мумкин.