«Янги Тошкент» халқаро аэропорти қурилиши бўйича лойиҳа офисининг хусусий шерик томонидан бош менеджери этиб туркиялик Берк Албайрак тайинланди. Бу ҳақда у ўзининг LinkedIn саҳифасида маълум қилди.
«Ушбу муҳим лойиҳа ривожига ўз ҳиссамни қўшиш ва катта муваффақиятларга эришиш йўлида барча манфаатдор томонлар билан бирга ишлаш имкониятини интиқлик билан кутаман», — деб ёзди.
Берк Албайрак илгари Европанинг тўртинчи йирик аэропорти ҳисобланган Истанбулдаги Сабиҳа Гёкчен номидаги аэропорт бош директори ва Қувайтнинг янги аэропорти қурилиши лойиҳаси директори лавозимларида ишлаган.
Haber.Aero маълумотларига кўра, Берк Албайрак 1970 йилда Анқарада туғилган. 1993 йилда Анқарадаги Яқин Шарқ техника университетининг (METU) фуқаролик қурилиши факультетида таҳсил олган. 1995 йилда шу университетда магистрлик даражасини олган.
Хусусий сектордаги фаолиятидан сўнг у Туркия Транспорт вазирлигининг Давлат аэропортлари бош бошқармасига (DHMI) ишга кириб, у ерда 10 йил давомида фаолият юритган. Кейинчалик Limak компанияси таркибидаги Сабиҳа Гёкчен аэропорти лойиҳасига қўшилиб, 16 йил давомида менежер, директор ва бош директор ўринбосари, шу вақтга қадар эса аэропорт бош директори лавозимларида ишлаган.
2025 йил бошида у Limak компанияси томонидан амалга оширилаётган, қиймати 5,5 млрд долларлик Қувайт янги аэропорти қурилиши лойиҳаси директори этиб ҳам тайинланган эди. Лойиҳани якунлаш 2026 йилга режалаштирилган.
«Янги Тошкент» аэропорти ҳақида
«Янги Тошкент» халқаро аэропорти Тошкент вилоятининг Ўрта Чирчиқ ва Қуйи Чирчиқ туманлари ҳудудида 1300 гектар майдонда қурилади. Ўзбекистон президенти Шавкат Мирзиёев 2025 йил октябрь ойида қурилишга старт берган эди.
Янги аэропортни қуриш қарори сўнгги саккиз йил ичида пойтахтга йўловчи оқими уч баравар кўпайиб, йилига 9 миллион кишига етгани, 2040 йилга бориб эса 24 миллиондан ошиши билан боғлиқ. Амалдаги аэропорт 11 миллион йўловчига мўлжалланган ва шаҳар ичида жойлашган.
Лойиҳа давлат-хусусий шериклик доирасида амалга оширилади. Vision Invest (Саудия Арабистони), лойиҳага «ўн миллиардлаб иена» сармоя киритадиган Sojitz савдо уйи (Япония), шунингдек, Incheon International Airport Corporation (Корея Республикаси) компаниялари хусусий шериклар сифатида иштирок этади.
Лойиҳа 4 босқичга мўлжалланган. Қиймати 2,5 млрд доллар бўлган биринчи босқичда аэровокзал мажмуаси ва аэродром барпо этилади.
Қурилиш якунлангач, аэропорт йилига 20 миллионгача йўловчи ва 129 минг тонна юкка хизмат кўрсатиш, соатига 30 тагача учиш ва қўнишни амалга ошириш ҳамда бир вақтнинг ўзида 62 та самолётни жойлаштириш имкониятига эга бўлади.
Янги аэропорт мажмуаси Тошкент — Самарқанд, Тошкент — Андижон ва Тошкент — Бўстонлиқ автомагистраллари билан тўғридан-тўғри боғланади. Шунингдек, бу ерда темир йўл станцияси қурилиб, у орқали тезюрар поездлар ҳаракати йўлга қўйилади, Тошкент ва Янги Тошкент марказлари ўртасида эса шаттл-транспортлар қатнови ташкил этилади.