Венесуэла мухолифати етакчиси Мария Корина Мачадо 2026 йил 15 январь куни Оқ уйдаги қабул чоғида ўзининг Нобель тинчлик мукофоти медалини АҚШ президенти Дональд Трампга топширди.
«Мен Америка Қўшма Штатлари президентига Нобель тинчлик мукофоти медалини топширдим», — деди Мачадо Оқ уйни тарк этгач журналистларга.
«200 йил олдин генерал Лафайет Симон Боливарга президент Жорж Вашингтон тасвири туширилган медални топширган эди. Ўшандан бери Симон Боливар ундан ҳеч қачон ажралмаган… 200 йил ўтиб, Боливар халқи Вашингтон вориси бўлмиш АҚШ президентига бизнинг озодлигимиз йўлидаги содиқлиги эътирофи сифатида Нобель мукофоти медалини топширмоқда», — дея баёнот берди.
Трамп Мачадо унга медаль топширганини тасдиқлади ва у билан танишганидан шараф туйганлигини айтди.
«У жуда кўп синовларни бошдан кечирган ажойиб аёл. Мария менинг меҳнатларим учун ўзининг Нобель тинчлик мукофотини менга топширди. Бу ўзаро ҳурматнинг жуда гўзал ишораси. Раҳмат, Мария!» — деб ёзди АҚШ президенти ўзининг Truth Social ижтимоий тармоғида.
Кейинроқ Оқ уй Мачадонинг Овал кабинетда Трамп билан бирга тушган суратини эълон қилди, унда президент катта рамкага солинган медални ушлаб турибди. Рамкадаги матнда шундай дейилган: «Венесуэла озодлигини таъминлаш йўлидаги президент Трампнинг принципиал ва қатъий ҳаракатлари эътирофи сифатида Венесуэла халқи номидан шахсий миннатдорчилик рамзи сифатида топширилди».
President Donald J. Trump meets with María Corina Machado of Venezuela in the Oval Office, during which she presented the President with her Nobel Peace Prize in recognition and honor.🕊️ pic.twitter.com/v7pYHjVNVO
— The White House (@WhiteHouse) January 16, 2026
Мачадо мукофотни Трамп билан бўлишиш ниятини ўтган ҳафтадаёқ маълум қилган эди, бироқ Нобель қўмитаси мукофот бошқа шахсга берилмаслигини аниқлаштирди.
«Нобель мукофоти эълон қилинганидан кейин у қайтариб олиниши, бўлиниши ёки бошқа шахсларга берилиши мумкин эмас. Қарор якуний ва доимий ҳисобланади», — дейилганди қўмита баёнотида.
Оқ уйдаги учрашув олдидан Нобель тинчлик маркази X ижтимоий тармоғида «медаль эгасини ўзгартириши мумкин, аммо Нобель тинчлик мукофоти лауреати унвони ўзгармайди», деган хабарни эълон қилди.
Fox News телеканалига берган интервьюсида Мачадо Нобель қўмитасининг баёнотига қарамай, нима учун медални Трампга топширгани ҳақидаги саволга: «Чунки у бунга лойиқ», — деб жавоб берди.
«Мен Нобель тинчлик мукофотини Венесуэла халқи номидан топширишга қарор қилдим», — дея қўшимча қилди.
Мачадо 2025 йил октябрь ойида «Венесуэла халқининг демократик ҳуқуқларини илгари суриш йўлидаги тинимсиз меҳнатлари ҳамда диктатурадан демократияга адолатли ва тинч йўл билан ўтиш учун олиб борган кураши учун» Нобель тинчлик мукофоти лауреати бўлган эди.
АҚШ 2026 йил январь ойи бошида ҳарбий операция давомида Венесуэла президенти Николас Мадурони қўлга олгач, Мачадо мухолифат ҳокимиятни ўз қўлига олишга тайёрлигини билдирди. У Венесуэлани собиқ президентликка номзод Эдмундо Гонсалес Уррутия — АҚШ томонидан 2024 йилги баҳсли сайловлардан сўнг сайланган давлат раҳбари деб тан олинган мухолифат номзоди бошқариши кераклигини таъкидлади.
Бироқ, Трамп бунинг ўрнига Венесуэла вице-президенти Делси Родригесни қўллаб-қувватлади. У Мачадони «ёқимли аёл» деб атади, аммо унинг етакчи бўлиши жуда қийинлигини айтди. «Унинг мамлакат ичида қўллови ва ҳурмати йўқ. У жуда яхши аёл, лекин унда ҳурмат йўқ», — деди.
Washington Post газетаси Оқ уйдаги манбаларига таяниб, Трамп Мачадони Нобель тинчлик мукофотини унга бўшатиб бермагани учун қўллаб-қувватлашдан бош тортганини ёзган эди. «Агар у мукофотни рад этиб: „Мен уни қабул қила олмайман, чунки у Дональд Трампга тегишли“, деганида эди, бугун у Венесуэла президенти бўлган бўларди», — деган нашр суҳбатдошларидан бири.
Трампнинг ўзи бир неча бор Нобель мукофотини олиш истагига ишора қилган, бироқ унга мукофот берилмаган эди. Шундан сўнг Америка етакчиси ташкилотчиларни танқид қила бошлади. «Мен якка ўзим 8 та урушга чек қўйдим ва НАТО аъзоси бўлган Норвегия аҳмоқона тарзда менга Нобель тинчлик мукофотини бермасликка қарор қилди», — деб ёзди у 7 январь куни Truth Socialʼда.
«Мачадо… медални Оқ уйда қолдириш орқали бу ишора унга анча қимматлироқ нарса: Мадуродан кейин Венесуэла етакчилиги учун курашда АҚШ қўлловини олиб келишига умид қилган эди. Аммо, агар у бу совға президентни аниқроқ қўллаб-қувватлашга ундайди деб ўйлаган бўлса, шекилли, кутишига тўғри келади», — деб ёзади CNN.
Мачадо Трамп билан учрашувни оптимистик руҳда баҳолаб, уни «тарихий» ва «ажойиб» деб атади. Бироқ, телеканал қайд этишича, фотосессия ва Трамп имзоси туширилган совға пакетидан ташқари у айнан нимага эришгани номаълум бўлиб қолмоқда.
Оқ уй матбуот котиби Кэролайн Левитт 2026 йил 15 январдаги брифингда Мачадо ҳақидаги фикр ўзгарган-ўзгармагани ҳақидаги саволга шундай жавоб берди: «Менимча, президентнинг сиз ҳозиргина кўрсатган баҳоси ишларнинг ҳақиқий ҳолатига асосланган эди. Бу президент ўз маслаҳатчилари ва миллий хавфсизлик жамоасидан ўқиган ва эшитганларига асосланган реалистик баҳо эди ва ҳозирча унинг бу масала бўйича фикри ўзгаргани йўқ».