Сеул марказий туман суди Жанубий Корея собиқ президенти Юн Сок Ёлни қўлга олинишига тўсқинлик қилиш айби билан беш йилга озодликдан маҳрум қилиш ҳақида ҳукм чиқарди. Бу 2024 йил декабрь ойида ҳарбий ҳолат жорий этилиши билан боғлиқ айбловлар бўйича собиқ давлат раҳбарига нисбатан чиқарилган биринчи ҳукм, деб хабар беради Yonhap.
Прокуратура Юн Сок Ёл учун 10 йил қамоқ жазосини талаб қилган эди. Собиқ президент ўз айбини тан олмади.
Юқори лавозимли амалдорлар ўртасидаги коррупцияни тергов қилиш бошқармаси (CIO) ўтган йилнинг январь ойи бошида Юн Сок Ёл исён иши бўйича сўроққа бир неча бор келишдан бош тортганидан сўнг уни ҳибсга олишга уринган эди. Бироқ қароргоҳда хавфсизлик хизмати билан бир неча соатлик тўқнашувдан сўнг терговчилар чекинишга мажбур бўлган. Улар иккинчи уринишдагина Юн Сок Ёлни ҳибсга олишга муваффақ бўлишди.
Собиқ президент CIO исён айбловларини тергов қилиш бўйича қонуний ваколатга эга эмаслигини иддао қилди. Бироқ суд бошқарма қонуний тинтув ва ҳибсга олиш ордери асосида ҳаракат қилган деган қарорга келди.
Юн Сок Ёлга нисбатан мамлакатда ҳарбий ҳолат жорий этишга уриниш билан боғлиқ жами 8 та жиноят иши қўзғатилган. Исён иши бўйича айблов томони унга ўлим жазосини сўраган. Ушбу иш бўйича ҳукм 2026 йил 19 февраль куни эълон қилиниши керак.