Хорижий давлатларда ўтказилаётган турли рейдлар давомида Ўзбекистон фуқароларининг ҳуқуқлари бузилаётгани ҳақидаги хабарлар жамиятда жиддий норозилик уйғотмоқда, деди президент Шавкат Мирзиёев 2026 йил 15 январь куни бўлиб ўтган йиғилишда.
Шу билан бирга, давлат раҳбари таъкидлаганидек, аксарият ҳолларда Ташқи ишлар вазирлиги фақат расмий нота юбориш билан чекланиб қолмоқда.
«Элчилар ва консуллар ҳар бир ҳолат бўйича малакали юридик ёрдам кўрсатиши ҳамда хориждаги фуқароларимизнинг ҳуқуқ ва манфаатларини ҳимоя қилиши шарт», — деди Шавкат Мирзиёев.
Бундан ташқари, президент хориждаги ўзбекистонлик ёшлар ёки талабаларнинг турли экстремистик оқимларга қўшилиб қолиши барчада жиддий хавотир уйғотиши кераклигини таъкидлади.
Шавкат Мирзиёев элчилар «кабинет дипломатияси»дан воз кечиши, ватандошлар ишлаётган ва ўқиётган қурилиш майдонларига, ётоқхоналарга, ўқув аудиторияларига бориши, уларнинг муаммоларини ўрганиши ва уларни ҳал қилиш устида ишлаши зарурлигини қайд этди.
Мутасаддиларга хорижда оғир вазиятга тушиб қолган ўзбекистонликлар учун бепул колл-марказ ташкил этиш, шунингдек, тегишли вазирликлар билан ҳамкорликда уларнинг мурожаатларини тезкорлик билан кўриб чиқишни йўлга қўйиш топширилди.