Тошкентда 12 январь куни Ўзбекистон Қуролли Кучлари таркибига кирувчи ҳарбий бўлинмаларнинг тантанали юриши ўтказилади, деб хабар берди Мудофаа вазирлиги матбуот хизмати.
Тадбир Қуролли Кучлар ташкил этилганлигининг 34 йиллиги ҳамда Ватан ҳимоячилари кунига бағишланган.
Юриш соат 11:00 да Ўзбекистон Ҳарбий хавфсизлик ва мудофаа университети ҳудудидан (мўлжал — «Пушкин» метро бекати) бошланиб, соат 13:00 га қадар давом этади.
Ҳарбий бўлинмалар Паркент ва Мустақиллик кўчалари бўйлаб ҳаракатланади. Сўнгра ҳарбийлар Амир Темур хиёбонида тўхтайди. У ерда Фахрий қоровул ротаси ва қўл жанги усталарининг кўргазмали чиқишлари, бўлинмаларнинг жанговар ҳайқириқлари ҳамда ҳарбий оркестр дефилеси намойиш этилади.
Шундан сўнг бўлинмалар Махтумқули ва Темирйўл кўчалари орқали дастлабки нуқтага қайтади.
Шу муносабат билан 12 январь куни соат 11:00 дан 13:00 гача юқорида қайд этилган кўчаларда автотранспорт воситалари ҳаракати вақтинча чекланади.
Мудофаа вазирлиги юзага келиши мумкин бўлган ноқулайликлар учун узр сўраб, пойтахт аҳолиси ва меҳмонларини байрам тадбирларида иштирок этишга таклиф этди.
