Самарқанд вилоятининг Пайариқ тумани тиббиёт бирлашмасида аёл яширинча туғиб, чақалоқни чиқинди қутисига ташлаб кетган. Ушбу ҳодиса ҳақида «Севимли» телеканалининг «Замон» кўрсатуви хабар берди.
Тиббиёт муассасаси маълумотларига кўра, 2025 йил 27 декабрь куни қайнонаси билан келган ёш аёл ичи қотишидан шикоят қилган. У тиббий кўрикдан ўтишдан бош тортиб, клизма қилишни сўраган. Унга шифокор кўриги ва УТТдан ўтиш таклиф қилинган, бироқ у буни ҳам рад этган.
Аёл муолажа хонасига юборилган. Муолажа вақтида у ҳамширадан уни ёлғиз қолдиришни сўраган ва бироздан сўнг тиббиёт муассасасини тарк этган. Хонани текширган тиббиёт ходимлари чиқинди қутиси ичидан ўлик ҳолдаги ўғил бола чақалоқни топишган.
Бирлашма ходимлари кузатув камералари орқали аёлнинг шахсини аниқлашган ва ҳолат бўйича ҳуқуқ-тартибот идораларига хабар беришган. Ҳозирда терговга қадар текширув бошланган, суд-тиббий экспертизаси тайинланган.
