Ўзбекистонда гипертонияни даволаш учун мўлжалланган Телсартан H (Telsartan H) препаратининг 80 мг/12,5 мг дозадаги алоҳида партияси муомаладан қайтариб олинди, деб хабар берди Соғлиқни сақлаш вазирлиги ҳузуридаги Фармацевтика маҳсулотлари хавфсизлиги маркази.
Дори воситаси Ҳиндистоннинг Dr. Reddy’s Laboratories компанияси томонидан ишлаб чиқарилади. Ишлаб чиқарувчи сифат назоратини ўтказиш давомида C2501976 серияли маҳсулот таркибидаги амалдаги моддалардан бири — гидрохлоротиазид миқдори нормативлардан четлашганини ўзи аниқлаган.
Шу билан бирга, Ўзбекистон ҳудудида муомалага киритилган C2501977 сериясида таъсир этувчи модда миқдори бўйича номувофиқликлар қайд этилмаган бўлса-да, юзага келиши мумкин бўлган хавфларнинг олдини олиш мақсадида уни ҳам қайтариб олишга қарор қилинган.
Ушбу сериядаги Телсартан H 80 мг/12,5 мг препаратини сотиб олган фуқаролардан дорини истеъмол қилмаслик, зарур ҳолларда эса даволовчи шифокор билан маслаҳатлашган ҳолда муқобил препарат танлаш сўралади.
Аввалроқ «Нестле Фуд» компанияси Ўзбекистон ҳудудида болалар озуқаси — қуруқ тез эрийдиган сут ва сут-қатиқ аралашмаларининг, шунингдек, аминокислоталар асосидаги даволаш парҳези учун мўлжалланган қуруқ аралашмаларнинг маълум партияларини ихтиёрий равишда қайтариб олган эди. Бу чоралар хорижий етказиб берувчидан олинган хомашёда (арахидон кислотаси) цереулид токсини бўлиши мумкинлиги сабабли кўрилган эди.
