Венесуэланинг муваққат ҳукумати АҚШга 30 миллиондан 50 миллион баррелгача нефть етказиб беради, деб баёнот берди Америка президенти Дональд Трамп.
«Венесуэланинг муваққат ҳукумати Америка Қўшма Штатларига 30 миллиондан 50 миллион баррелгача юқори сифатли, санкцияланган нефтни топширишини эълон қилишдан мамнунман», — деб ёзди у ўзининг Truth Social ижтимоий тармоғида.
Трампнинг сўзларига кўра, нефть бозор нархида сотилади, маблағларни эса «уларнинг Венесуэла ва Қўшма Штатлар халқи фаровонлиги йўлида ишлатилишини кафолатлаш» учун президентнинг шахсан ўзи назорат қилади.
«Мен энергетика вазири Крис Райтга ушбу режани зудлик билан амалга оширишни топширдим. Нефть омборларга кемаларда етказилади ва тўғридан-тўғри АҚШ ҳудудида туширилади», — дея қўшимча қилди Трамп.
Associated Press қайд этишича, Венесуэла дунёдаги энг йирик нефть захираларига эга, бироқ кунига атиги 1 миллион баррелга яқин нефть қазиб олади. Бу АҚШдаги ўртача кунлик қазиб олиш ҳажмидан анча паст — октябрь ойида АҚШда бу кўрсаткич кунига 13,9 миллион баррелга етган.
Бир баррель нефть нархи тахминан 56 доллар бўлганда, АҚШ Венесуэла нефти сотувидан 2,8 миллиард долларгача олиши мумкин. Қўшма Штатлар кунига ўртача 20 миллион баррель нефть истеъмол қилади, шу сабабли Венесуэла томонидан бериладиган ҳажм мамлакатнинг икки ярим кунлик захирасига тенг бўлади, деб ёзади агентлик.
CNN маълумотларига кўра, Венесуэла қайси давр мобайнида АҚШга нефть етказиб бериши ҳозирча номаълум.
Трамп маъмурияти, шунингдек, Венесуэла муваққат президенти Делси Родригесдан Россия, Хитой, Эрон ва Кубани мамлакатдан «ҳайдаб чиқаришни» ҳамда улар билан иқтисодий алоқаларни узишни талаб қилган, деб хабар бермоқда ABC News Оқ уй режаларидан хабардор манбаларига таяниб.
Телеканал суҳбатдошларининг сўзларига кўра, Венесуэла нефть қазиб олиш соҳасида фақат АҚШ билан ҳамкорлик қилишга рози бўлиши ва оғир нефтни сотишда унга устуворлик бериши керак.
АҚШ 2026 йил 3 январга ўтар кечаси Венесуэла президенти Николас Мадуро ва унинг рафиқаси Силия Флоресни қўлга олиш бўйича йирик ҳарбий операция ўтказди, натижада уларнинг иккаласи ҳам Нью-Йоркка олиб кетилди. Америка расмийлари Мадурони наркотерроризм мақсадида тил бириктириш, кокаин олиб кириш, АҚШга қарши қўллаш мақсадида қурол ва портловчи қурилмаларни сақлашда айбламоқда. 5 январь куни улар Нью-Йорк суди олдида намоён бўлишди ва айбларини тан олишмади.
Америка операциясидан сўнг Дональд Трамп АҚШ «хавфсиз, тартибли ва қонуний ҳокимият топширилишини амалга оширмагунча» Венесуэлани бошқаришини маълум қилди.
Вице-президент Делси Родригес Венесуэланинг муваққат президенти бўлди. У 5 январь куни қасамёд келтирди. Трамп ундан «мамлакатни қайта тиклашимиз учун нефть ва бошқа нарсалардан тўлиқ фойдаланиш имкониятини беришни» талаб қилди ва агар Родригес «ўзини тўғри тутмаса», уни Мадуроникидан ҳам ёмонроқ қисмат кутиши мумкинлиги билан таҳдид қилди.