2026 йил 1 январдан бошлаб Ўзбекистонда кичик ҳажмли автомобиллар импорти учун имтиёзли божхона божларининг амал қилиш муддати тугади. Бундан 2,5 йил аввал қабул қилинган ставкаларни пасайтириш тўғрисидаги қарор муддати узайтирилмади.
2023 йил июль ойида президент қарори билан тежамкор автомобиллар импорти учун божхона божлари пасайтирилган эди:
- двигатель ҳажми 1000 куб. см гача бўлган автомобиллар учун — 0 фоизгача,
- двигатель ҳажми 1200 куб. см гача бўлган автомобиллар учун — 5 фоизгача.
Ҳужжатда ушбу қарор ички автотранспорт бозорида рақобат муҳитини янада ривожлантириш ва аҳолини ҳамёнбоп енгил автомобиллар билан таъминлашга қаратилгани қайд этилган эди. ЎзА миллий ахборот агентлиги ушбу қарорни «кўпдан кутилган» деб атаганди.
Ўшанда двигатель ҳажми 1000 куб. см гача бўлган автомобиллар учун божхона божларининг умумий миқдори 39−43 фоиздан 19−23 фоизгача, 1000−1200 куб. см бўлганлари учун эса 44−52 фоиздан 30−36 фоизгача камайиши хабар қилинган эди.
Имтиёзлар муддати тугагач, йил бошидан стандарт ставкалар қўлланилмоқда.
Эндиликда:
- двигатель ҳажми 1000 куб. см гача бўлган янги (бир йилгача бўлган) енгил автомобиллар учун божхона божи божхона қийматининг 15 фоизини ва ҳар бир куб. см учун 0,4 АҚШ долларини ташкил этади;
- двигатель ҳажми 1200 куб. см гача бўлган янги енгил автомобиллар учун 15 фоизлик ставка ва ҳар бир куб. см учун 0,6 АҚШ доллари миқдоридаги бож амал қилади.
