АҚШ 2026 йил 3 январь кечаси Венесуэла пойтахти Каракасга зарбалар берди. CBS News ва CNN маълумотларига кўра, портлашлар бир нечта жойда, жумладан, Фуэрте-Тиуна ҳарбий базаси, Ла-Карлота авиабазаси ва Ла-Гуайра портида қайд этилган.
АҚШ Президенти Дональд Трамп АҚШ Венесуэладаги объектларга зарбалар берганини ҳамда президент Николас Мадурони «қўлга олиб», мамлакатдан олиб чиқиб кетганини тасдиқлади.
«Америка Қўшма Штатлари Венесуэла ва унинг етакчиси, президент Николас Мадурога қарши йирик кўламли операцияни муваффақиятли ўтказди. Мадуро рафиқаси билан бирга қўлга олинди ва самолётда мамлакатдан олиб чиқиб кетилди. Ушбу операция АҚШ ҳуқуқ-тартибот идоралари билан ҳамкорликда амалга оширилди», — дейилади Трампнинг Truth Social ижтимоий тармоғидаги хабарида.
CBS News манбаларининг хабар беришича, Мадуро АҚШ қуролли кучларининг элита махсус бўлинмаси — «Дельта Форс» ҳарбий хизматчилари томонидан қўлга олинган.
«Венесуэла учун янги давра! Мустабид ағдарилди. Энди у ниҳоят ўз жиноятлари учун адолат олдида жавоб беради», — дея вазиятга изоҳ берди АҚШ давлат котиби ёрдамчиси Кристофер Ландау X ижтимоий тармоғида.
Венесуэла ҳукумати АҚШ зарбаларидан сўнг ўз тарафдорларини кўчаларга чиқишга чақирди. «Халқ кўчаларга! — дейилади баёнотда. — Боливариан ҳукумати мамлакатдаги барча ижтимоий ва сиёсий кучларни сафарбарлик режаларини фаоллаштиришга ҳамда ушбу империалистик ҳужумни рад этишга чақиради».
Венесуэла мудофаа вазири Владимир Падрино Лопес бутун мамлакат бўйлаб ҳарбий кучлар жойлаштирилишини ва фавқулодда ҳолат жорий этилишини эълон қилди. Шунингдек, Венесуэла БМТ Хавфсизлик кенгашининг фавқулодда йиғилишини ўтказишни сўради.
Венесуэла вице-президенти Делси Родригес давлат телевидениеси орқали чиқиш қилиб, Николас Мадуро ва унинг рафиқаси қаерда эканлиги унга номаълумлигини айтди. У АҚШдан Мадуро ва унинг турмуш ўртоғи тирик эканлиги ҳақида далиллар тақдим этишни талаб қилди. Родригес, шунингдек, АҚШ ҳужуми натижасида Венесуэла расмийлари, ҳарбийлари ва тинч аҳоли вакиллари ҳалок бўлганини маълум қилди.
Республикачи сенатор Майк Ли АҚШ давлат котиби Марко Рубио билан гаплашганини айтди. Унинг сўзларига кўра, Рубио Мадуро АҚШдаги жиноий айбловлар бўйича суд жараёнини ўтказиш учун америкалик ҳарбийлар томонидан ҳибсга олинганини маълум қилган.
«У [Рубио] Мадуро АҚШ ҳибсида экан, Венесуэлада бошқа ҳеч қандай ҳаракатлар бўлишини кутмаяпти», — деди Ли.
Венесуэлага берилган зарбалар сўнгги ойларда АҚШнинг Кариб ҳавзасидаги ҳарбий иштироки кучайиши ортидан юз берди. 2025 йил декабрь ойида АҚШ Венесуэла қирғоқлари яқинида иккита нефть танкерини қўлга олган ва Оқ уйнинг таъкидлашича, гиёҳванд моддалар ташиган 30 дан ортиқ кемага ҳужум қилган эди.
Аввалроқ Трамп маъмурияти Мадурони наркосавдода ва террорчи ташкилот деб тан олинган картеллар билан ҳамкорликда айблаган эди. Мадуро буни инкор этиб келган. Трамп, шунингдек, Мадуро манзилига бир неча бор таҳдидлар қилиб, Венесуэла президентининг кунлари «саноқли» эканини ва у учун ихтиёрий равишда истеъфога чиқиш «оқилона» бўлишини айтган эди.