Муҳокама учун 5 йилга — 2026–2030 йилларга мўлжалланган қайта кўриб чиқилган «Ўзбекистон–2030» стратегияси лойиҳаси эълон қилинди. Бу ҳақда 30 декабрь куни «Тараққиёт стратегияси» маркази маълум қилди.
5 та устувор йўналишни қамраб олган «Ўзбекистон–2030» стратегияси икки йил аввал — 2023 йил кузида Президент Шавкат Мирзиёевнинг фармони билан тасдиқланган эди.
2025 йил 26 декабрь куни давлат раҳбари Парламентга ва Ўзбекистон халқига йўллаган Мурожаатномасида «эришган юксак натижаларимиз, олдимизда турган янги устувор вазифалар „Ўзбекистон–2030“ стратегиясини қайта кўриб чиқишни тақозо этмоқда», деб баёнот берган эди.
Президент, хусусан, стратегияда Ўзбекистон ЯИМ ҳажмини 2030 йилга бориб 160 млрд долларга етказиш режалаштирилганини, бироқ бу маррага 2026 йилдаёқ эришиш кутилаётганини, келгуси беш йил ичида эса бу рақам 240 млрд долларгача ўсиши мумкинлигини таъкидлади.
2025 йил 30 декабрь куни «Тараққиёт стратегияси» марказида бўлиб ўтган матбуот анжуманида қайд этилишича, глобал иқтисодиёт ва халқаро муносабатлардаги тенденциялар, дунё бозорларидаги тебранишлар, иқлим ўзгариши, энергетика бозорларининг трансформацияси, рақамли технологиялар ва сунъий интеллектнинг ривожланиши, шунингдек, ўсиб бораётган аҳолининг ўзгарувчан эҳтиёжлари янги ечимларни талаб қилмоқда.
Янгиланган стратегия лойиҳаси давлат органлари ва илмий марказларнинг 350 дан ортиқ вакиллари иштирокида ишлаб чиқилган бўлиб, улар амалдаги стратегиянинг 444 та самарадорлик кўрсаткичларининг ҳар бирини баҳолаб чиқдилар.
«Шиор-мезонлардан воз кечиш»
«Тараққиёт стратегияси» маркази тайёрланган лойиҳанинг бир неча хусусиятларига тўхталиб ўтди.
Биринчидан, барча кўрсаткичлар «ҳар бир инсон ва оила ҳаётида акс этиши» керак бўлган янги мақсадларни ҳисобга олган ҳолда қайта кўриб чиқилди ва тўлдирилди.
Иккинчидан, барча кўрсаткичлар ўлчанадиган ҳолатга келтирилди, яъни рақамларда ифодаланди. Баҳолаб ёки ўлчаб бўлмайдиган, умумий вазифалар, топшириқлар ва шиорлардан иборат кўрсаткичлар (бундайлар 130 та эди) чиқариб ташланди.
Учинчидан, барча кўрсаткичларнинг ижроси йиллар кесимида белгиланган, бу эса ҳар йилги ривожланишни кузатиб бориш имконини беради.
Тўртинчидан, самарадорлик кўрсаткичлари ҳар бир вазирлик ва идора (улар 60 га яқин) кесимида белгилаб берилди.
Бешинчидан, ҳужжатда ҳар бир кўрсаткичга эришиш учун зарур бўлган молиялаштиришнинг аниқ манбалари кўрсатилган.
Олтинчидан, лойиҳада тармоқлар, соҳалар ва ҳудудларни ривожлантиришга оид барча концепция ҳамда стратегиялар «Ўзбекистон–2030» стратегиясига мувофиқ бўлиши белгиланди. Лойиҳа иловасида ана шундай 50 та ҳужжатнинг (4 та концепция, соҳа ва тармоқларни ривожлантириш бўйича 38 та стратегия, ҳудудларни ривожлантириш бўйича 14 та стратегия) номлари келтирилган.
Стратегиянинг самарадорлик кўрсаткичларига эришиш барча давлат органлари ва ташкилотларининг яна устувор вазифаси этиб белгиланади.