Хитойнинг Leapmotor Automobile Co. Ltd. компанияси 2025 йил 13 апрелдан бошлаб Ўзбекистонда расман фаолият юритишни бошламоқчи. Бу ҳақида Ўзбек миллий синов ва сифат назорати маркази (UzTest) матбуот хизмати хабар берди.
Марказ маълумотига кўра, автомобиль ишлаб чиқарувчи Ўзбекистон Техник тартибга солиш агентлиги ва UzTest манзилига расман мурожаат йўллаб, C16 моделдаги автомобиллар мамлакат ҳудудига норасмий дистрибьюторлар орқали олиб кирилганини тан олди. Компания бу билан боғлиқ муаммоларни бартараф этишга тайёрлигини маълум қилган.
UzTest хабарида айтилишича, Leapmotor қуйидагиларни тасдиқлаган:
- компания Ўзбекистонда фақат расмий дистрибьютор орқали фаолият юритади;
- расмий рухсатномасиз олиб кирилган автомобиллар ишлаб чиқарувчи томонидан тан олинмайди ва кафолатли расмий хизмат кўрсатиш мажбуриятига эга эмас;
- транспорт воситаси турини тасдиқлаш сертификатини (OTTC) олиш учун зарур синовлар яқин вақт ичида якунланади;
- келгусида сифат назоратини кучайтириш мақсадида UzTest билан кенг ҳамкорлик режалаштирилмоқда.
«Бу ҳамкорлик автомобилларнинг хавфсизлик, сифат ва техник стандартларга мувофиқлигини таъминлашга қаратилган», — дейилади синов ва сифат назорати маркази хабарида.
2024 йил март ойида UzTest маркази C16 моделида электромагнит мослашув даражаси бўйича аниқланган камчиликлар туфайли Leapmotor автомобилларининг барча турларини сертификатлаш учун аризаларни қабул қилишни тўхтатган эди.
Бундан аввал Leapmotor Weibo платформасида расмий баёнот бериб, текширув натижалари билан рози эмаслигини билдирган ва қайта синовлардан ўтишга тайёр эканини билдирган. Компания синов натижаларини тан олмаганини қайд этган.
2024 йил ноябридан бошлаб Техник тартибга солиш агентлиги импорт автомобиллар техник кўригини ўтказиш тартибини ўзгартирган. Бунга кўра, транспорт воситалари божхона ҳудудида эмас, балки махсус полигонда синовдан ўтказилади ва электромагнит мослашув текшируви жорий қилинган.
Текширув ҳақидаги видеога муносабат
11 апрел куни Telegram’даги autodeklarant канали муаллифи Пскентдаги полигондан видеони жойлаб, текширувлар фақат расмиятчилик учун ўтказилаётгани, «ички жиҳатлари текширилмаётгани» ва вақт чўзилаётганини таъкидлаган.
«Эҳтимол, яхши сотиладиган машиналарга нисбатан қаттиқроқ назорат қўлланилар? Лекин, аслида, ҳеч қайси автомобиль импортчиси кафолатланмаган – агентлик бир моделда нуқсон “топиб”, бутун брендни тақиқлаши мумкин», — деб ёзган у.
Муаллиф бу видеони кенг тарқатишни ва президентга мурожаат қилиб, «эскирган, замон талабига жавоб бермайдиган текширув тартибларини бекор қилиш ҳамда тадбиркорлар ва фуқароларга тўсиқ яратиётган агентлик ходимларига чора кўриш»ни сўрашга чақирган.
UzTest бу маълумотни нотўғри деб атаган ва видеода акс этган ҳолат 2024 йил ноябрига тегишли эканини, ҳозирги текширувларга алоқаси йўқлигини маълум қилган.
«Ўзбекистон миллий синов ва сифат назорати маркази маълум қиладики, ушбу видеони нотўғри талқин қилган ва жамоатчиликни чалғитиш мақсадида тарқатган блогерга нисбатан ҳуқуқий баҳо берилади», — дейилади баёнотда.
Юртимизга олиб кирилаётган М1 тоифали автомобиллар электромагнит мослашув бўйича БМТнинг №10−03 Қоидаларига мувофиқ текширувдан ўтиши керак.
Транспорт воситасини муомалага чиқариш учун икки ҳужжат талаб этилади: транспорт воситаси турини тасдиқлаш гувоҳномаси (оммавий ишлаб чиқариш учун) ва мувофиқлик сертификати (якка автомобиль учун).
Бугунги кунга келиб давлат реестрида 81 та турни тасдиқлаш ҳужжати рўйхатга олинган, шундан 10 таси маҳаллий ишлаб чиқарувчиларга, 71 таси эса импортчиларга тегишли. Бу ҳужжатлар M1 тоифасидаги 44 хил Хитой, 18 та Корея, 3 та Германия, 3 та Япония, 2 та Россия, 1 та АҚШ ва 17 та Ўзбекистон автомобилларини қамраб олган.
Импорт автомобиллар қаторида Chevrolet, BYD, Volkswagen, Changan, Chery, Haval, Jetour, JAC, Jetta, MG, Soueast, Zeekr, Seres, Vohay, Kia, Hyundai, Porsche ва Toyota каби брендлар мавжуд.
Мамлакатда автомобилларни чакана сотиш Вазирлар Маҳкамасининг 2003 йил 13 февралдаги 75-сонли қарори билан тартибга солинган бўлиб, унга кўра сотувчилар кафолат муддати давомида бепул сервис хизматини ва зарур эҳтиёт қисмларини тақдим этишлари шарт.
Транспорт воситаси турини тасдиқлаш гувоҳномасини олиш учун фақат ишлаб чиқарувчи ёки унинг расмий вакили ариза бериш ҳуқуқига эга. UzTest маълум қилишича, агентлик раҳбарияти Hongqi, Dongfeng ва Lixiang каби ишлаб чиқарувчилар билан расмий асосда ишлаш ва Ўзбекистонда ваколатхона очиш бўйича музокаралар олиб бормоқда.
Фуқароларга фақат расмий дилерлар орқали автомобил харид қилиш тавсия қилинди.
