Одилжон Абдуқаҳҳоров давлат муассасаси «Ўзбекконцерт» директори этиб тайинланди. Бу ҳақида 2025 йил 11 март куни Ўзбекистон маданият вазири Озодбек Назарбеков раислигида ўтган йиғилишда маълум бўлди.
Йиғилишда «Ўзбекконцерт» директори Одилжон Абдуқаҳҳоров, Давлат филармонияси раҳбари Анвар Тожибоев, Республика бахшичилик санъати маркази раҳбари Умиджон Норбоев, Маданият вазирлиги ҳузуридаги Халқаро фестиваллар дирекцияси директори Фотиҳ Жалоловга ижро интизомини таъминлаш топширилди.
Одилжон Абдуқаҳҳоров 2017 йил октябридан 2020 йил 10 июнигача «Ўзбекконцерт»га раҳбарлик қилган ва бошқа ишга ўтиши муносабати билан лавозимидан озод этилган эди.
2020 йилнинг ноябрь ойида ташкилот директори этиб Анваржон Тожибоев тайинланган. 2021 йил май ойида уни Жамолиддин Узоқов алмаштирган. 2022 йил май ойида лавозимни Даврон Шералиев эгаллаган. 2023 йил октябрь ойида эса директор вазифасини бажарувчи этиб Санжар Эрданов тайинланган.
Эслатиб ўтамиз, 2024 йил октябрь ойи бошида Ўзбекистон Маданият вазирлиги концерт ташкилотчиларини «Ўзбекконцерт»га миллий қадриятлар ва анъаналарга мувофиқлигини текшириш учун батафсил сценарий тақдим этишга мажбур қилишни таклиф қилган эди. Мақсад — санъаткорларнинг саҳнадаги «ножўя хатти-ҳаракатлари»нинг олдини олиш.
Ўша ойда «Ўзбекконцерт» санъаткорларга Ўзбекистон ташқарисида концертлар ўтказишдан олдин идорани ёзма равишда хабардор қилиш кераклигини эслатди. Ушбу талабни бузган тақдирда, уларнинг лицензиялари тўхтатилиши мумкин.
Март ойида «Ўзбекконцерт»даги йиғилишда санъаткорларга чет элда этикет, маданият ва ўзбек қадриятларини унутмаслик, шунингдек, дабдабабозликдан воз кечиш тавсия этилди. Маданият вазирининг биринчи ўринбосари Баҳодир Аҳмедов ҳам ватанпарварлик руҳидаги қўшиқлар сонини кўпайтириш муҳимлигини таъкидлади.
