Ўзбекистонда 2025 йил 21 августдан “Ташаббусли бюджет-2025” дастурининг иккинчи мавсуми доирасида овоз бериш босқичи бошланди, деб хабар берди Иқтисодиёт ва молия вазирлиги.
Бу босқич 2025 йил 31 август куни соат 23:59 гача давом этади. Иккинчи мавсум ғолиблари 1 сентябрь – Мустақиллик кунида эълон қилинади.
Фуқаролар ташаббусли лойиҳаларни бир нечта каналлар орқали қўллаб-қувватлаши мумкин. Унда иштирок этиш учун учта усул назарда тутилган:
- “Очиқ бюджет” расмий сайти орқали;
- Android ва iOS учун мўлжалланган мобил илова орқали;
- Telegram-бот орқали.
Вазирлик маълумотларига кўра, фуқароларнинг овоз беришдаги иштироки маҳаллий аҳоли учун муҳим аҳамиятга эга бўлган лойиҳаларни амалга оширишда ҳал қилувчи роль ўйнайди.
Овоз бериш босқичига тақдим этилган 22263 лойиҳадан 18619 таси (83,6%) ўтди. Ташаббусларнинг аксарияти (10485 таси / 56,3%) ички йўлларни таъмирлаш билан, шунингдек, кўча ёритиш тизими (трансформаторлар ва электр узатиш линияларини ўрнатиш) — 2548 та (13,7%), мактабларнинг моддий-техник базасини таъмирлаш ва яхшилаш — 2409 та (12,9%) билан боғлиқ. Ғолиб бўлган лойиҳаларни молиялаштириш учун 2,7 триллион сўм ажратиш режалаштирилган.
2025 йилнинг 20 март куни якунланган биринчи мавсумда мактаблар, йўллар ва бошқа объектларни таъмирлаш бўйича фуқаролар ташаббуслари учун 10,5 миллион овоз тўпланган. 2369 та лойиҳа ғолиб деб топилиб, 3,2 триллион сўм маблағ ажратилган.
Аввалги йиллардагидек, жараён давомида ташаббусли бюджет доирасидаги лойиҳаларга мажбурий овоз бериш ҳолатлари аниқланди. Иқтисодиёт ва молия вазирлиги мажбурий овоз бериш ҳолатлари аниқланган лойиҳаларни рўйхатдан чиқариш тўғрисида тақдимнома юборган.