Россиянинг йирик нефть компанияларидан бири «Лукойл» санкциялар туфайли хорижий активларини сотиш режаларини эълон қилди. Бу ҳақда компания ўзининг сайтида хабар берди.
2025 йил 22 октябрь куни АҚШ Молия вазирлигининг Хорижий активлар назорати бошқармаси (OFAC) «Лукойл»ни санкциялар рўйхатига киритиб, блоклаш чекловларини қўллади. Санкциялар компания ва унинг «Лукойл» улуши 50%дан ортиқ бўлган шўъба корхоналари билан операцияларни тўхтатиш учун бир ойлик муддатни (21 ноябргача) назарда тутади.
АҚШ фуқаролари ёки молия институтлари ва хорижий давлатларга 2025 йил 21 ноябрдан кейин бу компаниялар ва уларнинг шўъбаларига ёрдам бериш тақиқланади, акс ҳолда барчага санкциялар таҳдид солади.
«Қатор давлатлар томонидан компания ва унинг шўъба корхоналарига нисбатан чеклов чоралари жорий этилиши муносабати билан, компания ўзининг халқаро активларини сотиш ниятида эканини эълон қилади. Потенциал харидорлардан таклифларни кўриб чиқиш аллақачон бошланган», — дея хабар берди «Лукойл» матбуот хизмати.
Компания активларни сотиш OFAC’нинг фаолиятни тўхтатиш бўйича лицензияси асосида амалга оширилишини қайд этди. Зарурат туғилганда, халқаро активларнинг узлуксиз ишлашини таъминлаш учун лицензиянинг амал қилиш муддатини узайтириш учун ариза бериш режалаштирилган.
Компания Қозоғистон, Ўзбекистон, Озарбайжон, Ироқ, Камерун, Нигерия, Гана ва бошқа мамлакатларда фаолият юритади, Европада нефтни қайта ишлаш заводларига ва дунёнинг 19 мамлакатида АЁҚШ тармоғига эга.
«Лукойл» ва «Роснефть»га қарши АҚШ санкцияларини изоҳлар экан, Марказий банк раиси Тимур Ишметов Ўзбекистонга эҳтимолий таъсир бўлиши мумкинлигини, аммо узоқ муддатли шартномалар ва дипломатик механизмлар эҳтимол тутилган оқибатларни камайтириш имконини беришини маълум қилди. Унинг сўзларига кўра, мамлакат санкция режимига риоя қилиш бўйича қатъий позицияга эга.
«Лукойл»нинг Ўзбекистондаги лойиҳалари
«Лукойл» Ўзбекистоннинг ёқилғи-энергетика секторидаги энг йирик хорижий инвесторлардан бири ҳисобланади. Компаниянинг 2024 йилдаги умумий инвестиция ҳажми 10 млрд доллардан ошди.
Ҳукумат 2004 йилда Россия компанияси билан Бухоро вилоятидаги «Қандим-Ҳавзак-Шоди» лойиҳалари (35 йил муддатга, 2014 йилда яна 7 йилга — 2046 йилгача узайтирилган) ва Қашқадарёдаги «Жануби-Ғарбий Ҳисор» (2007 йилда кучга кирган ва 36 йилга, 2043 йилгача мўлжалланган) бўйича Маҳсулот тақсимоти тўғрисидаги битимни (МТТБ) имзолаган.
«Лукойл»нинг Ўзбекистондаги энг йирик лойиҳаси — йиллик қуввати 8,1 млрд куб метр газни ташкил этувчи, умумий инвестицияси 3,5 млрд доллар бўлган Қандим газни қайта ишлаш комплекси ҳисобланади. Қандим комплекси Марказий Осиёдаги янги технологияларга эга энг йирик газни қайта ишлаш корхоналаридан бирига айланди.
«Лукойл» «Ўзбекнефтгаз»дан кейин Ўзбекистондаги иккинчи йирик газ ишлаб чиқарувчи ҳисобланади. 2024 йил 1 июнь ҳолатига кўра, компания томонидан қазиб олинган газнинг жамланган ҳажми аллақачон 134,4 млрд куб метрга етган. 2023 йилда у мамлакатнинг 13 та газ конида иш олиб борган.
2021 йил 1 январь ҳолатига кўра, энг йирик тасдиқланган захиралар «Ўзбекнефтгаз» ихтиёрида бўлган — 934,1 млрд куб метр газ (жорий захираларнинг 50%). «Лукойл» 413,1 млрд куб метр газ захирасига эга конларда (22,1%), Uz-Kor Gas Chemical — 109,6 млрд куб метр (5,9%), Surhan Gas Chemical — 106,6 млрд (5,8%), Jizzakh Petroleum (ҳозирги Saneg) — 84,9 млрд куб метр (4,5%) конларда ишлаган.
Россия компанияси Ўзбекистонда ёқилғи қуйиш шохобчалари тармоғини ҳам очган. Компаниянинг Тошкентдаги биринчи АЁҚШи 2018 йилда очилган. 2024 йил апрель ойида Тошкентнинг шаҳар атрофи туманларида яна иккита шохобча очилган.
«Лукойл» ҳозирча айнан қайси активларни сотишни режалаштираётгани ва санкциялар Ўзбекистондаги жорий лойиҳаларга қандай таъсир қилишини аниқлаштирмади.
