2026 йил январь ойида Ўзбекистон кўчмас мулк бозорида фаолликнинг ошиши кузатилди. Бу ҳақда Иқтисодий тадқиқотлар ва ислоҳотлар маркази (ИТИМ) шарҳида сўз боради.
2026 йил январь ойида 28,6 мингта кўчмас мулк олди-сотди шартномаси рўйхатга олинди — бу 2025 йилнинг январь ойига (25,5 минг) нисбатан 12,1 фоизга кўп.
Ижобий динамика аксарият ҳудудларда қайд этилган. Энг катта ўсиш мамлакат кўчмас мулк бозорининг қарийб учдан бир қисми тўғри келадиган Тошкент шаҳрида кузатилди. Пойтахтда битимлар сони 33,4 фоизга ошган — бу ҳудудлар орасидаги энг юқори кўрсаткич.
Шунингдек, Самарқанд (+26 фоиз) ва Сирдарё (+24 фоиз) вилоятларида ҳам сезиларли ўсиш кузатилган.
Иккиламчи бозор
Ўтган ой давомида иккиламчи уй-жой нархларининг мўътадил ўсиши қайд этилди. Республика бўйича ўртача бир квадрат метр нархи бир ойда 0,9 фоизга ошди. Йиллик ҳисобда ўсиш 8 фоизни ташкил этди.
Йил давомида уй-жой нархларининг энг юқори ўсиш суръатлари Сурхондарё (26,6 фоиз) ва Сирдарё (21,9 фоиз) вилоятларида кузатилди. Хоразм вилоятида нархлар бир ойда 7,6 фоизга, йил давомида эса 17,5 фоизга, Қорақалпоғистонда эса тегишлича 0,4 фоиз ва 15 фоизга ошган.
Тошкент вилоятида январь якунларига кўра уй-жой ўртача 2,3 фоизга арзонлашган, йил давомида эса 0,7 фоизлик кичик ўсиш рўйхатга олинган.
Тошкент шаҳри
Тошкентнинг иккиламчи уй-жой бозорида январь ойида 1 кв. м нинг ўртача нархи қарийб 1120 долларни ташкил этди. Бир ойда нархлар 0,6 фоизга, йиллик ҳисобда эса деярли 2 фоизга ошган.
Иккиламчи бозорда нархларнинг энг юқори йиллик ўсиши Яккасарой (+5,7 фоиз) ва Миробод (+4,3 фоиз) туманларида қайд этилди.
Шу билан бирга, пойтахтнинг бирламчи бозорида ўсиш анча сезиларли бўлди: янги қурилган уйларда бир квадрат метрнинг ўртача нархи 2025 йилнинг январига нисбатан 9 фоиздан кўпроққа ошган, деб қайд этади ИТИМ.
Янги уй-жой нархларининг энг юқори ўсиш суръатлари Миробод (+18,4 фоиз) ва Мирзо Улуғбек (+17,3 фоиз) туманларида кузатилган.
Ижара бозори
2026 йил январь ойида Тошкентда уй-жой ижарасининг ўртача нархи 1 кв. м учун қарийб 8,8 долларни ташкил этди — бу 2025 йилги даражадан 9 фоизга юқори.
Энг юқори ижара ставкалари марказий туманлар — Миробод, Шайхонтоҳур, Яккасарой ва Мирзо Улуғбек туманларида сақланиб қолмоқда, бу ерда ўртача нарх 1 кв. м учун қарийб 11 долларга етади.
Йил давомида ижара ставкаларининг энг тез ўсиши Олмазор, Юнусобод, Яшнобод, Чилонзор ва Мирзо Улуғбек туманларида кузатилган — ўртача қарийб 13 фоиз.
2025 йилнинг тўққиз ойи якунлари бўйича Марказий банк ўз шарҳида янги қурилган уйлар нархи сўмда 2,4 фоизга ва долларда 5,5 фоизга, иккиламчи бозорда эса 1,8 фоиз ва 5 фоизга ошганини хабар қилган эди. Бозор ўсиши асосан хусусий уй-жойлар ҳисобига таъминланган.