Ўзбекистон Ички ишлар вазирлиги Сирдарё вилояти Гулистон шаҳридаги Bek Family Cafe кафесида газ баллони портлаши билан боғлиқ иш бўйича яна икки кишининг ҳибсга олинганини маълум қилди. Вилоят ИИБ бир нафар гумонланувчининг қўлга олингани ҳақида хабар берган эди.
ИИВ маълумотларига кўра, портлаш 2025 йил 2 декабрь куни тахминан соат 10:50 да содир бўлган. «Тараққиёт» маҳалласида жойлашган мазкур муассасанинг ошхонасида 50 литрли суюлтирилган пропан гази баллонидан газ сизиб чиққан, бу баллон ёнғин хавфсизлиги қоидаларини бузган ҳолда плитага уланган эди. Газ-ҳаво аралашмасининг ёниши портлашга олиб келган.
Натижада 29 киши жабрланган, улардан 3 нафари шифохонада вафот этган. Аҳволи қониқарли деб баҳоланган 5 нафар бемор шифохонадан чиқарилган. Ҳозирда 5 нафар беморнинг аҳволи оғир, 1 нафари эса ўта оғир.
Мазкур ҳолат юзасидан Ўзбекистон Жиноят кодексининг 192-11-моддаси 1-қисми (Нодавлат тижорат ёки бошқа нодавлат ташкилоти мансабдор шахслари томонидан ўз ваколатларини суиистеъмол қилиш), 257-моддаси 2-қисми «а, б» бандлари (Меҳнатни муҳофаза қилиш қоидаларини бузиш, одам ўлимига ва бошқа оғир оқибатларга олиб келиши) ва 259-моддаси 2-қисми «а, б» бандлари (Ёнғин хавфсизлиги қоидаларини бузиш, одам ўлимига ва бошқа оғир оқибатларга олиб келиши) билан жиноят иши қўзғатилган. Bek Family Cafe нинг уч нафар мансабдор шахси ҳибсга олинган.
Терговни Ички ишлар вазири ўринбосари — Тергов департаменти бошлиғи Рамазон Ашрапов раҳбарлигидаги мутахассислар гуруҳи олиб бормоқда.
Bek Family Cafe 2022 йил февраль ойида Гулистонда рўйхатдан ўтган. Устав фонди — 1,3 млрд сўм. Таъсисчиси — Ойбек Сотиболдиев, раҳбари — Азиз Холжигитов.
Эслатиб ўтамиз, аввалроқ жабрланганларга ёрдам кўрсатиш ва фожиа сабабларини аниқлаш учун ҳукумат комиссияси тузилган эди.
Президент Шавкат Мирзиёев 2025 йил 4 декабрь куни Сирдарё вилоятига ишчи сафари чоғида жабрланганлар даволанаётган шифохонага ташриф буюрди. Давлат раҳбари ҳалок бўлганларнинг оилаларига уч кун ичида 100 млн сўмдан ажратиш бўйича топшириқ берди. У, «фожиа фавқулодда вазиятларнинг олдини олиш тизими учун катта дарс бўлиши кераклигини» таъкидлади.