Ўзбекистон бокс федерацияси боксчи ва Олимпия чемпиони Лазизбек Муллажоновнинг допинг-тест натижалари сабаб вақтинча четлатилганига изоҳ берди.
World Boxing мустақил антидопинг дастури учун масъул бўлган Халқаро тест агентлиги (ITA) 2025 йил 29 июль куни антидопинг қоидаларини бузганликда гумон қилиниб, Лазизбек Муллажоновни спорт тадбирларидан вақтинча четлатгани ҳақида хабар берган эди.
ITA маълумотларига кўра, 2025 йил 11 июнь куни боксчидан мусобақадан ташқари допинг-назорати доирасида намуна олинган. Натижада унинг организмида метастерон метаболитлари — мушакларнинг тез ўсиши, куч ва чидамлиликни оширишга ёрдам берувчи синтетик анаболик андроген стероид аниқланган. У мусобақа пайтида ҳам, ундан ташқарида ҳам тақиқланган.
Бокс федерацияси хабарига кўра, спортчи мунтазам равишда допинг-тест топширади ва унинг аввалги барча таҳлиллари салбий бўлган.
2024 йил 19 ноябрь куни, яъни 2024 йилги Олимпиададан сўнг, Муллажонов Фарғонадаги хусусий клиникада соч кўчириш бўйича 4 босқичли операцияни ўтказган. Тахминларга кўра, тиббий муолажалар ва кейинги даволаниш жараёнида тақиқланган моддаларни ўз ичига олган препаратлардан фойдаланилган бўлиши мумкин. Барча тегишли ҳужжатлар ва тиббий маълумотномалар аллақачон ITA’га топширилган.
Ўзбекистон бокс федерацияси мазкур ҳолат Лазизбек Муллажоновнинг Париж Олимпия ўйинларидаги натижасига ҳеч қандай таъсир кўрсатмаслигини ва эҳтимолий дисквалификация ҳақидаги тарқалаётган миш-мишлар асоссиз эканлигини таъкидлайди.
Лазизбек Муллажонов 92 кг вазн тоифасида Олимпия ўйинларида «олтин» медални қўлга киритган. Бугун у профессионал боксдаги фаолиятини давом эттирмоқда.
Аввалроқ таэквондочи Улуғбек Рашитов антидопинг қоидаларини бузганлиги, яъни қаерда эканлиги ҳақидаги маълумотни тақдим этиш шартларига риоя қилмагани учун икки йилга дисквалификация қилинган эди.
