2025 йил 1 июндан бошлаб Ўзбекистонда Йўл ҳаракати қоидаларини бузганлик учун жарима балларини ҳисоблаш тизими ишга туширилди.
ЙҲХББ хабар беришича, ҳайдовчилар (жисмоний шахслар) жарима баллари ҳақидаги маълумотларни онлайн тарзда текширишлари мумкин: Ягона интерактив давлат хизматлари портали (хизматга ҳавола) ёки Safe Road мобил иловаси (iOS, Android) орқали.
Тақдим этилган маълумотларда тўпланган жарима баллари сони, жарима тўғрисидаги қарор рақами ва санаси, шунингдек, баллар ҳисобланган Маъмурий жавобгарлик тўғрисидаги кодекс моддаси кўрсатилади.
Баллар қандай ҳисобланади
Биринчи босқичда янгилик фақат ЙҲХББ ходимлари томонидан қайд этилган қоидабузарликларга тегишли бўлади. Келажакда тизимни камералар томонидан қайд этилган қоидабузарликларга ҳам жорий этиш режалаштирилган.
Янгилик вақтинча бўлиб турган хорижий ҳайдовчилар, дипломатлар ва халқаро ташкилотларга (Ўзбекистон фуқаролари ва доимий яшовчи шахслар бундан мустасно) татбиқ этилмайди.
Баллар ҳисобланадиган моддалар ва қоидабузарликлар рўйхати:
125-модда
- 3-қисм — техник носоз тормоз тизими, руль бошқаруви ёки уланиш қурилмаси бўлган транспорт воситасини бошқариш, шунингдек, рухсатсиз қайта жиҳозлаш — 0,3 балл;
- 5-қисм — фойдаланиши тақиқланган ёки давлат рақамисиз автомобилни бошқариш — 1 балл.
126-модда
- 1-қисм — ойналарни ойналанган, қорайтирилган (тонировка қилинган) ва кўришни чеклайдиган қопламалардан фойдаланиш — 0,5 балл.
127-модда
- 1-қисм — асоссиз овоз сигналидан фойдаланиш, ностандарт ёруғлик/овоз қурилмаларини ўрнатиш — 0,2 балл.
128−3-модда
- 1-қисм — тезликни 20 км/соатгача ошириш — 0,5 балл;
- 2-қисм — тезликни 20 дан 40 км/соатгача ошириш — 1 балл;
- 3-қисм — тезликни 40 дан 60 км/соатгача ошириш — 1,5 балл;
- 4-қисм — тезликни 60 км/соатдан ортиқ ошириш — 2 балл.
128−4-модда
- 2-қисм — қизил чироқда ёки тартибга солувчининг тақиқловчи ишорасида ҳаракатланиш — 1 балл.
128−5-модда
- 1-қисм — милтилловчи маёқчалари бўлган тезкор ва махсус хизматларнинг ҳаракатланишига тўсқинлик қилиш — 0,5 балл;
- 2-қисм — қарама-қарши йўлга чиқиш ёки авария ҳолатини юзага келтириш — 1 балл.
128−6-модда
- тўхташ ёки тўхтаб туриш қоидаларини бузиш — 0,2 балл.
128−8-модда
- 1-қисм — йўловчи ташиш қоидаларини бузиш — 0,3 балл;
- 2-қисм — автобусларда/микроавтобусларда йўловчиларни ички ишлар органлари ходимларининг кузатувисиз ташиш (зарурати бўлганда) — 0,5 балл.
128−9-модда
- қувиб ўтиш қоидаларини бузиш — 1 балл.
129-модда
- йўл ҳаракати хавфсизлигига таҳдид солувчи гуруҳлар таркибида ҳаракатланишда иштирок этиш — 1,5 балл.
130-модда
- темир йўл кесишмасидан ўтиш қоидаларини бузиш — 1 балл.
137-модда
- 1-қисм — йўл-транспорт ҳодисаси жойини белгиланган қоидаларни бузган ҳолда тарк этиш — 2 балл.
Агар 12 ой ичида баллар суммаси 12 баллдан ошмаса, баллар бекор қилинади.
12 ой давомида ЙҲҚни бузмаган ҳайдовчиларни рағбатлантириш учун кейинги қоидабузарлик учун биринчи жарима балли ҳисобланмайди.
Агар охирги қайд этилган қоидабузарликдан сўнг ҳайдовчи 6 ой давомида бошқа ЙҲҚни бузмаса, унинг жарима баллари умумий сонидан 2 балл чегириб ташланади.
Агар ҳайдовчи бир йил ичида 12 жарима баллини тўпласа, унинг ҳайдовчилик гувоҳномаси олиб қўйилади.
12 балл тўплаш — осонми (ёки йўқми?)
ЙҲХББ матбуот хизмати рус тилидаги хабарида шундай ёзган: «12 балл тўплаш жуда оддий… Бу амалда нимани англатади? Тўхташ ёки тўхтаб туриш қоидаларини 60 марта бузиш етарли. Ёки 12 марта қизил чироқда ўтиш. Ёки хавфли гуруҳли ҳаракатда 8 марта иштирок этиш».
Шу билан бирга, ўзбек тилидаги хабарда аксинча айтилган: «12 балл тўплаш осон эмас. Бунинг учун оғир қоидабузар бўлиш керак».
