АҚШ президенти Дональд Трамп маъмурияти Америка Қўшма Штатларига кириш визаси учун ариза топширишда фуқаролари 15 минг долларгача миқдорда гаров пули тўлаши шарт бўлган давлатлар рўйхатига еттита мамлакатни қўшди, деб хабар бермоқда Washington Post ва Associated Press.
Рўйхатга Бутан, Ботсвана, Марказий Африка Республикаси, Гвинея, Гвинея-Бисау, Намибия ва Туркманистон қўшилди. Ўзгаришлар 2026 йил 1 январдан кучга кирди. Бугунги кунда мазкур рўйхат жами 13 та давлатни ўз ичига олган бўлиб, уларнинг аксарияти Африкада жойлашган.
Гаров суммаси муайян ҳолатлардан келиб чиқиб 5000 доллардан 15000 долларгачани ташкил этади. Гаров пулининг тўланиши виза берилишини кафолатламайди, бироқ виза бериш рад этилган тақдирда тўлов қайтариб берилади.
Гаров шартларига кўра, аризаси маъқулланган шахслар АҚШга фақат учта халқаро аэропорт: Логан (Бостон), Кеннеди (Нью-Йорк) ва Даллес (Вашингтон) аэропортлари орқали киришлари мумкин.
АҚШ Давлат департаменти чет элликларга пул гарови эвазига кириш визаларини бериш бўйича синов дастурини 2025 йил август ойида ишга туширган эди. Дастур фақат ишбилармонлик ва сайёҳлик визаларига (B-1 ва B-2 тоифалари) ҳамда Қўшма Штатларга киргандан кейин рухсат этилган бўлиш муддатини ноқонуний равишда ошириб юборадиганлар улуши юқори бўлган мамлакатлар фуқароларига тааллуқли.
2025 йил июнь ойида Дональд Трамп Африка, Лотин Америкаси ва Осиёнинг 19 та давлати, жумладан, Афғонистон ва Туркманистон фуқароларининг АҚШга киришини тақиқлаш ва чеклаш тўғрисидаги фармонни имзолаган эди. Ушбу мамлакатлар АҚШ учун юқори хавф туғдирувчи давлатлар деб топилган. 2025 йил декабрь ойида Оқ уй Туркманистон фуқаролари учун кириш чекловларини юмшатди ва буни мамлакат ҳукумати «сезиларли ютуқларни намойиш этгани» билан изоҳлади.
