Европанинг Airbus авиасозлик корпорацияси А320 оиласига мансуб бўлиб, хавфсизликдаги заифлик таъсир қилиши мумкин бўлган деярли барча самолётларнинг дастурий таъминоти (ДТ) янгиланганини эълон қилди.
«Тахминан 6000 та потенциал хавф остидаги самолётларнинг аксарияти аллақачон керакли модификацияларни қабул қилган. Биз қолган 100 дан кам самолётни модификациялашга ёрдам бериш ва уларнинг эксплуатацияга қайтишини таъминлаш учун мижоз-авиакомпанияларимиз билан ишламоқдамиз», — дейилади компания баёнотида.
2025 йил октябрь ойи охирида Американинг JetBlue авиакомпаниясига тегишли А320 самолёти Канкундан (Мексика) Ньюаркка (АҚШ) парвоз қилаётганда кутилмаганда баландлигини йўқотган эди. Бир неча сониядан сўнг, самолёт нормал режимга қайтди, бунда автопилот ёқилган ҳолда қолганди. Ҳодиса натижасида камида 15 киши жароҳатланди. Лайнер Тампада фавқулодда қўнишни амалга оширди.
28 ноябрь куни Airbus тергов натижаларига кўра, кучли қуёш нурланиши парвозни бошқариш учун муҳим бўлган маълумотларга зарар етказиши мумкинлигини маълум қилди. Европа авиация хавфсизлиги агентлиги (EASA) парвозни бошқариш блокларидан бирининг ДТни янгилашни талаб этувчи фавқулодда директивани эълон қилди.
Uzbekistan Airways компанияси А320 оиласига мансуб барча самолётларининг ДТни бир сутка ичида модификациялаганини маълум қилди. Centrum Air эса компания самолётлари директива таъсирига тушмаслигини ва чекловларсиз эксплуатация қилинаётганини айтди.
Аниқланган заифлик нимадан иборат эканлиги ҳақида маълумот берилган эди.