Президент имзолаган қарорга кўра, 2025 йили Туркистонда жадидлар ҳаракати асосчиларидан бири, жамоат арбоби, ёзувчи ва нашриётчи Маҳмудхўжа Беҳбудийнинг 150 йиллиги Ўзбекистонда кенг нишонланади.
«Маҳмудхўжа Беҳбудий ХХ асрнинг бошларида — Ватанимиз тарихидаги мураккаб бир даврда Туркистонда жадидчилик ҳаракатининг асосчисига айланган эди. У ўзини аямайдиган шахс ва миллий озодлик ҳаракатининг етакчи вакили сифатида ҳаётини илм-фан, таълим ва тарбия, адабиёт ва санъат, матбуот соҳаларини ривожлантиришга, халқнинг онгини уйғотишга ва дунёқарашини кенгайтиришга, шунингдек, дунё тараққиётининг илғор ютуқларини ўзлаштириш орқали мустақилликка эришишга бағишлади», — дейилади қарорда.
«Подшоҳ режими ва маҳаллий консерватив кучларнинг қаршилигига қарамай, Маҳмудхўжа Беҳбудий мамлакатимизда илк бор замонавий мактабларни ташкил қилиш, улар учун зарур ўқув қўлланмаларини яратиш, нашриётлар ва театрлар очиш ишларига бошчилик қилган. Публицист сифатида у ўз даврининг долзарб муаммоларига бағишланган ёрқин асарлар ва икки юздан ортиқ мақолалар ёзган. Шу билан бирга, “Самарқанд” газетаси ва “Ойина” журналига асос солган. 1914 йилда “Турон” театрида унинг “Падаркуш” пьесаси саҳналаштирилган бўлиб, бу мамлакатимизда театр санъатининг ривожланишига асос солган. Афсуски, истеъдодли ёзувчи ва кўзга кўринган жамоат арбоби 44 ёшида ёвуз кучларнинг қурбонига айланган», — дейилади ҳужжатда.
