Навоий вилоятининг Конимех туманида 2026 йил 22 февраль куни содир бўлган йўл-транспорт ҳодисаси оқибатида тўрт киши ҳалок бўлди. Бу ҳақда Milliy телеканалининг Millar дастури хабар берди.
Кўрсатув маълумотларига кўра, ҳалок бўлганлардан бири 2002 йилда туғилган йигит. Унинг таниши Instagram ижтимоий тармоғида дўстининг хотирасига бағишланган видеоролик эълон қилди. Дастур журналистлари марҳумнинг яқинлари билан телефон орқали боғландилар.
Марҳумнинг дўстининг сўзларига кўра, автомобилда унинг бошқа ўртоқлари ҳам бўлган. Дастлабки маълумотларга кўра, аварияга қувиб ўтиш қоидаларининг бузилиши сабаб бўлган.
Журналистлар расмий изоҳ олиш учун Навоий вилояти Ички ишлар бошқармаси ахборот хизматига мурожаат қилишди. Идорадан маълум қилинишича, икки нафар фуқаро ҳодиса жойида, яна икки нафари шифохонада вафот этган.
Қайд этилишича, бу каби аварияларнинг олдини олиш мақсадида масъул шахслар ва ҳайдовчининг ҳамкасблари иштирокида муҳокама ўтказилган. Бу ҳақда Навоий вилояти ЙҲХБнинг расмий Telegram-каналида ҳам хабар берилган, бироқ ҳодиса тафсилотлари очиқланмаган.
Хусусан, ИИВ Жамоат хавфсизлиги департаменти Йўл ҳаракати хавфсизлиги хизмати бошлиғи ўринбосари, полковник Муродбек Шералиев ЙТҲ келиб чиқиш сабаблари таҳлилига тўхталиб ўтди.
У бундай ҳолатлар барчани янада ҳушёр бўлишга ундаши кераклигини, жамоатчилик вакиллари эса қоидабузарликлар ва авариялар профилактикасида фаол иштирок этиши лозимлигини таъкидлади. Унинг сўзларига кўра, бу йўналишдаги тушунтириш ишларини аввало оиладан бошлаш зарур.
Мазкур ҳолат юзасидан жиноят иши қўзғатилган, тергов ҳаракатлари олиб борилмоқда.