2026 йил 8 февралга ўтар кечаси Тошкент вилоятининг Ангрен шаҳридаги тўрт қаватли уйнинг юқори қаватидаги хонадонда ёнғин чиқди, оқибатда бир киши ҳалок бўлди. Бу ҳақда Ўзбекистон ФВВ матбуот хизмати хабар берди.
Ёнғин ҳақидаги хабар соат 23:19 да келиб тушган. Ўт ўчириш экипажлари воқеа жойига 23:30 да етиб борган, бинодан барча аҳоли эвакуация қилинган. Соат 23:57 да ёнғин қуршаб олинган. Уни фақат тунги соат 0:50 да бутунлай ўчиришга муваффақ бўлинган.
Соат 1:00 дан кейин ФВВ воқеа жойига фавқулодда вазиятлар вазири Азизбек Икромов етиб борганини маълум қилди.
Ижтимоий тармоқлардаги видеоларда олов бинонинг томи бўйлаб тарқалганини кўриш мумкин. «Дарё» нашрининг ёзишича, бир киши жонлантириш бўлимида қолмоқда.