Ўзбекистонда хусусийлаштирилган ер участкалари эгалари учун ер ва мол-мулк солиқларини бирлаштириш режалаштирилмоқда. Бу ҳақда Солиқ қўмитаси раиси Шерзод Кудбиев 2025 йил 5 июль куни Савдо-саноат палатаси томонидан меҳмонхона бизнеси ва аудиторлик компаниялари вакиллари билан ташкил этилган очиқ мулоқотда маълум қилди.
«Бу йўналишда ҳам иш кетмоқда. Сиз 2026 йилги [солиқ] концепциясида кўрасиз. Агар сиз ерни хусусийлаштирган бўлсангиз, бунинг механизми бизда аллақачон ишга тушган, яъни у сизнинг мулкингизга айланган. Хусусийлаштирилган ердан, мантиқан, сиз ер солиғини эмас, балки мол-мулк солиғини тўлашингиз керак», — деди у.
Аудиторнинг эҳтимолий икки томонлама солиққа тортиш ҳақидаги саволига жавоб берар экан, у шундай таъкидлади: «Бу икки томонлама солиққа тортиш деган фикрга қўшилмайман. Йўқ, агар сиз ҳозир тўлаган бўлсангиз, бизда ҳеч ким ер учун мол-мулк солиғини тўламаган, лекин тўлаши керак. Шунинг учун бу 2026 йилдан бошланиши мумкин. Лекин бунгача, масалан, бир хил ердан 2 марта ҳам ер солиғи, ҳам мол-мулк солиғини ҳеч ким олмаган».
Унинг қўшимча қилишича, солиқларни бозор қийматини ҳисобга олган ҳолда ҳисоблашга ўтиш бўйича ишлар ҳам давом этмоқда: «Бозор қийматига доир ишлар ҳам кетмоқда ва ўйлайманки, бу йўналишда ўзгаришлар бўлади».
