Европа Иттифоқи Россияга қарши 19-санкциялар пакети доирасида Қозоғистон, Қирғизистон ва Тожикистондаги қатор банклар билан транзакцияларга чекловлар жорий этди.
Санкцияларга, хусусан, Россиянинг ВТБ банкининг Қозоғистондаги филиали, Қирғизистоннинг «Толубай» ва «Евразийский сберегательный банк» банклари, Тожикистоннинг «Душанбе Сити банк», «Спитамен» ва «Коммерцбанк» банклари тушди.
Санкциялар рўйхатига, шунингдек, ВТБ, «Сбер» ва Альфа-банкнинг Беларусь филиаллари ҳамда Беларусьнинг «БелВЭБ» ва «Белгазпромбанк» банклари киритилди. Бундан ташқари, Payeer тўлов тизимига қарши ҳам санкциялар жорий этилди.
Чекловлар 2025 йил ноябрь ва декабрь ойларида кучга киради.
Европа Иттифоқининг янги санкциялар пакети Россиядан суюлтирилган табиий газни импорт қилишни 2027 йилгача тақиқлашни, РФнинг «соя флоти» деб аталувчи яна 117 та танкерини қора рўйхатга киритишни, «Роснефтъ» ва «Газпромнефтъ» билан битимларни тўлиқ тақиқлашни, шунингдек, Брюссель маълумотларига кўра, Россияга санкцияларни четлаб ўтишда ёрдам бераётган 45 та ташкилотга, шу жумладан Хитой ва Гонконгдаги 12 та компанияга қарши чекловларни ўз ичига олади.
