Осиё инфратузилма инвестициялари банки (ОИИБ) ва Ўзбекистон ҳукумати Яшил ва барқарор бозор иқтисодиётига ўтиш дастурини 500 миллион доллар миқдорида молиялаштириш тўғрисидаги келишувни имзолади, дея хабар берди банк матбуот хизмати.
Бу Ўзбекистонни янада яшил, барқарор ва бозорга йўналтирилган ривожланиш моделига айлантиришни тезлаштиришга қаратилган ислоҳотлар дастури.
Дастур ҳукуматга янада самарали бошқарув тизимини қуришга ёрдам беришга мўлжалланган: у паст эмиссияли ривожланишга ўтишни қўллаб-қувватлайди, давлат органлари фаолиятининг самарадорлигини оширади ва мамлакатнинг иқлим хавфларига қарши барқарорлигини кучайтиради.
Асосий қадамлар қаторига энергетика ва давлат компанияларида бошқарув шаффофлиги ва самарадорлигини ошириш, иқлимга йўналтирилган давлат харидлари қоидаларини жорий этиш, шунингдек, углерод кредитларини чиқариш ва муомаласи учун тушунарли ва шаффоф нормаларни яратиш киради. Буларнинг барчаси мониторинг ва ҳисобот тизимига асосланади ва хусусий инвестицияларни жалб қилишни осонлаштиришга қаратилган.
Дастур Жаҳон банки билан биргаликда молиялаштирилади. У Ўзбекистоннинг 2019–2030 йилларга мўлжалланган яшил иқтисодиётга ўтиш стратегияси, шунингдек, мамлакатнинг эмиссияларни камайтириш бўйича мажбуриятларига тўлиқ мос келади.
«Бу дастур ОИИБнинг Ўзбекистонда барқарор иқлим ва иқтисодий натижаларни таъминлашга қодир бўлган ислоҳотларни қўллаб-қувватлашга содиқлигини акс эттиради, — деди ОИИБ инвестициялар бўйича директори (2-минтақа) Константин Лимитовский. — Асосий иқлим ислоҳотларини илгари суриш орқали дастур иқлимни молиялаштиришни кенгайтириш ва хусусий секторнинг иштироки учун шарт-шароит яратади. Биз Ўзбекистон ҳукумати билан унинг «яшил» ўтиш йўлида яқин ҳамкорликни давом эттиришни интиқлик билан кутамиз».
Ресурслардан оқилона фойдаланиш, тозароқ энергетика ечимларини жорий этиш ва иқлимга йўналтирилган тартибга солишни яхшилаш иссиқхона газлари чиқиндиларини камайтиришга, ҳаво сифатини яхшилашга ва иқлим хавфларига чидамлиликни оширишга ёрдам бериши кутилмоқда.
Энергия самарадорлиги юқори бўлган технологиялардан кенгроқ фойдаланиш энергия харажатларини камайтириши ва ҳаёт шароитини, айниқса, ижтимоий ҳимояга муҳтож гуруҳлар учун яхшилаши керак.