Economist журналининг таҳлилий бўлинмаси — Economist Intelligence Unit — дунёнинг яшаш учун энг қулай шаҳарлари рейтингини (Global Liveability Index 2025) эълон қилди. Унда Дания пойтахти Копенгаген биринчи ўринни эгаллади.
Бу йил рўйхатга 173 та шаҳар киритилган. Баҳолаш 5 та параметр асосида тузилади: соғлиқни сақлаш, маданият ва атроф-муҳит, таълим, инфратузилма, барқарорлик.
Economist’нинг таъкидлашича, глобал беқарорлик туфайли дунёдаги шаҳарларда яшаш шароитлари иккинчи йил кетма-кет яхшиланмаяпти. Илгари 3 йил кетма-кет рейтинг етакчиси бўлган Вена 2 та олди олинган теракт — бири америкалик хонанда Тейлор Свифт концертида, иккинчиси темир йўл вокзалида содир этилгани сабабли биринчи ўринни бой берди. Ҳозирда Австрия пойтахти Швейцариянинг Цюрих шаҳри билан иккинчи ўринни бўлишиб турибди.
Биринчи ўнликка Австралиянинг Мельбурн, Швейцариянинг Женева, Австралиянинг Сидней, Япониянинг Осака, Янги Зеландиянинг Окленд, Австралиянинг Аделаида ва Канаданинг Ванкувер шаҳарлари ҳам кирди.
Лондон ва Нью-Йорк мос равишда 54 ва 69-ўринларни эгаллади. Economist’нинг ёзишича, бу шаҳарларда жиноятчилик даражаси ва террорчилик таҳдиди юқори, йўллар эса тирбанд. Дунёдаги энг йирик шаҳар Токио 13-ўринни эгаллади.
Рейтингда охирги ўринларни Бангладеш пойтахти Дакка, Ливиянинг Триполи ва Суриянинг Дамашқ шаҳарлари эгаллади.
Рейтинг очиқ эълон қилинмаган, шу боис Тошкент унда нечанчи ўринни эгаллагани номаълум. Шу билан бирга, эълон қилинган графикда Ўзбекистон пойтахти оч кулранг рангда кўрсатилган, демак, максимал 100 баллдан 50 дан 60 баллгача тўплаган. Масалан, Копенгаген 98 баллга эга.
