2027 йилдан бошлаб Ўзбекистондаги янги кўп квартирали уйларни қуриш лойиҳаларида ичимлик сувининг замонавий электрон ҳисоблагичларини ўрнатиш мажбурий бўлиши режалаштирилмоқда. Бу Ўзбекистон президентининг 2026 йил 24 февралдаги фармонида кўзда тутилган.
Ҳужжатга кўра, барча янги кўп қаватли уйларнинг йўлаклари ва хонадонларида амалдаги техник регламентларга мувофиқлик сертификатларига эга бўлган сув ҳисоблагичлари ўрнатилиши керак.
Бундан ташқари, хонадонларга кирувчи ичимлик суви тармоқларида биттадан кўп бўлмаган ҳисобга олиш тугуни (ўлчов нуқтаси) назарда тутилади.
Ушбу чорани амалга ошириш учун Қурилиш ва уй-жой коммунал хўжалиги вазирлиги, Қорақалпоғистон Вазирлар Кенгаши, вилоятлар ва Тошкент шаҳри ҳокимликлари, шунингдек, Иқтисодиёт ва молия вазирлиги масъул этиб белгиланди.
2026 йилга мўлжалланган давлат дастурида 305 мингдан ортиқ сув ҳисоблагичларини ўрнатиш кўзда тутилган.
2025 йил июль ойида Тошкент шаҳридаги турар жой биноларида ичимлик сувини ҳисобга олиш ва назорат қилишнинг «ақлли» асбобларини оммавий ўрнатиш бошланган эди. «Тошкент шаҳар сув таъминоти» компанияси ушбу жараён Шайхонтоҳур туманидаги икки йиллик синов лойиҳасидан сўнг йўлга қўйилганини маълум қилди. Ўтган йили 50 мингта шундай ҳисоблагич ўрнатиш режалаштирилган эди, 2030 йилгача эса уларнинг сонини 670 мингтага етказиш мўлжалланмоқда.
2025 йилнинг май ойида «Технопарк» компанияси (улуши Тошкент шаҳар ҳокимлигига тегишли, лекин корхонанинг ўзи бошқа хусусий компания ишончли бошқарувида) AKFA BUILD компанияси Австриянинг Diehl Metering компанияси билан биргаликда Osten сув ҳисоблагичларини ишлаб чиқаришни бошлаганини хабар қилган эди.
Шу билан бирга, сертификатларининг амал қилиш муддати тугагани сабабли «Эко Ном» ва «Новатор» маркали сув ҳисоблагичларини ўрнатишга йўл қўйилмаган. «Ўзсувтаъминот» компанияси аввалроқ ўрнатилган ва тамғаланган ушбу маркадаги ҳисоблагичлардан фойдаланишда давом этиш мумкинлигини тушунтирган эди.
«Ақлли» сув ҳисоблагичларини ўрнатиш Франциянинг Suez компанияси билан биргаликда амалга оширилаётган «Тошкент шаҳри ичимлик суви таъминоти ва канализация тизимини трансформация қилиш» лойиҳаси доирасида амалга оширилмоқда.