Янги Тошкентда узунлиги 8 км бўлган метро линияси қурилиши режалаштирилган, дея хабар берди Вазирлар Маҳкамаси ҳузуридаги «Янги Тошкент» шаҳри қурилиши дирекцияси. Кейинчалик бу хабар ўчириб ташланди.
Янги линия «Дўстлик» бекатидан «Янги Тошкент»гача бўлган маршрутнинг бир қисми бўлади. Дирекция маълумотига кўра, қурилишни 2026 йил охиригача якунлаш режалаштирилган.
Лойиҳа қиймати 110 миллион долларга баҳоланмоқда. 2025 йилда 11 миллион доллар, қолган 99 миллион доллар эса 2026 йилда ўзлаштирилиши режалаштирилган.
Инвестор Туркиянинг Xvav Yapi Sanayi Ve Tic. A. S. компанияси бўлади. Аввалроқ дирекция метро қурилиши учун пудратчини танлаш бўйича танлов ўтказилгани ҳақида хабар бермаган эди.
2025 йил июнь ойида Ўзбекистон президентига «Дўстлик» бекатидан Янги Тошкентгача узунлиги 21 км бўлган янги метро линияси қурилиши лойиҳаси тақдим этилган эди.
Россиянинг «Мосинжпроект» инжиниринг компанияси ва Туркиянинг Doğuş Holding компанияси Янги Тошкентгача бўлган метро линиясини лойиҳалаш ва қуришда иштирок этиши ҳақида маълум қилинган эди. Қурилиш ишлари олиб борилаётган Олимпия шаҳарчаси ёнида янги линиянинг учинчи бекати жойлашади.
Ерости участкасининг бир километр қиймати (тоннелларни монолит усулда қуриш) тахминан 8 миллион долларга баҳолангани қайд этилган.