Ўзбекистон Устюрт ҳудуди бўйича Маҳсулот тақсимоти тўғрисидаги битимни (МТТБ) амалга оширишни тезлаштиришни режалаштирмоқда, деб хабар берди энергетика вазири Жўрабек Мирзамаҳмудов Озарбайжоннинг Report нашрига берган интервьюсида.
Унинг сўзларига кўра, Устюрт ҳудуди бугунги кунда «асосан газ қазиб олинган, минтақадаги энг истиқболли йўналишлардан бири» ҳисобланади. Вазир барча тарихий маълумотларни ўрганиб чиққач, Озарбайжоннинг SOCAR компанияси нефть захираларини қидиришга қизиқиш билдирганини ва МТТБ доирасида лойиҳа оператори аллақачон ташкил этилганини таъкидлади.
«Олдимизда катта вазифа турибди — ишларни бошлашни тезлаштириш. Биз 2025 йил охиригача 3000 погональ километрдан ортиқ ҳажмда сейсмоқидирув ўтказиш бўйича амалий ишларни бошлашни режалаштиряпмиз. Ушбу ишлар натижаларига кўра, биринчи қудуқни бурғулашни режалаштирганмиз», — деди Мирзамаҳмудов.
У томонларнинг улушлари классик модель бўйича тақсимланганини аниқлади: «50 га 50% — давлат ва инвесторлар. Инвесторлар сифатида SOCAR ва «Ўзбекнефтгаз» иштирок этмоқда». «Газета» лойиҳага Британиянинг BP компанияси ҳам қизиқиш билдиргани ва у билан дастлабки музокаралар олиб борилаётгани ҳақида хабар берган эди.
Вазир барча тижорат шартлари — «маҳсулот тақсимоти, солиққа тортиш ва бошқа параметрлар» битимда мустаҳкамланганини таъкидлади.
Унинг сўзларига кўра, дастлабки 3 йил сейсмоқидирув, бурғулаш ва дастлабки натижаларни олиш учун ажратилган. «Зарур инфратузилмани қуришни ҳисобга олган ҳолда, биринчи қазиб олишга чиқиш учун уч йилдан 5 йилгача вақт керак бўлади», — дея қўшимча қилди.
Мирзамаҳмудов айнан шу ҳудудларда аввал бурғулаш ишлари олиб борилмаганини, бироқ қўшни ҳудудларда ишлар олиб борилганини қайд этди. «Технологиялар анча ривожланди: агар 70-йилларда Устюрт ҳудудида йирик конлар очилиши кутилмаган бўлса, замонавий талқин усуллари юқори салоҳиятни кўрсатди. Бу бошқа таҳлилий компанияларнинг тадқиқот натижалари билан ҳам тасдиқланади», — деди.
Вазир, шунингдек, SOCAR мутахассислари «нефть бўйича яхши кўрсаткичларни» прогноз қилаётганини маълум қилди. «Агар прогнозлар ўз тасдиғини топса, биз нефтни қайта ишлаш заводини қуриш бўйича параллел равишда ишларни бошлаймиз», — деб таъкидлади.
Бундан ташқари, Мирзамаҳмудовнинг сўзларига кўра, кичик тоннажли кимё лойиҳалари аллақачон ишлаб чиқилмоқда: «Биз SOCAR ва бошқа ҳамкорлар билан ҳамкорлик қилишга тайёрмиз».
Ўзбекистон Энергетика вазирлиги, Озарбайжон давлат нефть компанияси (SOCAR) ва «Ўзбекнефтгаз» 24 июль куни Маҳсулот тақсимоти тўғрисидаги битимни (МТТБ) имзолаган эди. Ҳужжат Устюрт нефть ва газли ҳудудининг Бойтерак, Теренгқудуқ, Бирғори, Харой, Қорақалпоқ ва Кулбой инвестиция блокларида геологоқидирув ишларини олиб бориш ва кейинчалик углеводород қазиб олишни назарда тутади.
Ҳужжатга кўра, қидирув ва разведка ишлари, шунингдек, камида битта қидирув қудуғини бурғулашни 5 йил ичида якунлаш режалаштирилган. Бу даврда SOCAR оператор сифатида фаолият юритади.
«Ўзбекистон 24» телеканали лойиҳа доирасида 100 миллион тонна нефть ва 35 миллиард куб метр табиий газ захираси топилиши прогноз қилинаётгани ҳақида хабар берган эди. Мутахассисларнинг фикрича, гап «улкан нефть ресурсларига эга йирик кон очилиши мумкинлиги» ҳақида кетмоқда.
