Ўзбекистон Республикаси Президенти Шавкат Мирзиёев 2025 йил 3 ноябрь куни хавфсизлик ва рақамлаштириш соҳасидаги янги ташаббуслар билан танишди. Улар орасида — гиёҳвандликка қарши кураш чоралари, «Рақамли прокуратура — 2030» стратегияси ва киберҳуқуқ бўйича бакалавриат йўналишини очиш бор.
Президент Администрацияси ҳузуридаги Жамоат хавфсизлиги ва қонун устуворлиги масалалари департаменти бошлиғи ўринбосари Сергей Гордеев «Ўзбекистон 24» каналига берган интервьюсида, давлат раҳбари идораларга аҳоли орасида, биринчи навбатда, аёллар, ёшлар ва вояга етмаганлар орасида гиёҳвандлик ва уюшган наркожиноятчиликнинг олдини олиш ва унга қарши курашиш бўйича қўшма ишларни кучайтиришни топширганини айтди.
Унинг сўзларига кўра, тезкор-қидирув ва тергов бўлинмаларининг бу йўналишлардаги манзилли ишини кучайтириш, шунингдек, жиноят-ҳуқуқий нормаларни яхшилаш зарур.
«Дунёда уюшган наркожиноятчилик трансчегаравий хусусиятга эга ва аҳоли даромади ўсиб бораётган ва иқтисодиёти ривожланаётган мамлакатлар даражасига етмоқда. Гарчи Ўзбекистонда бу борадаги вазият барқарор бўлса-да, агар биз бугун курашни бошламасак, айнан ёшлар ва вояга етмаганлар орасига жиноятчилик ва наркотикларнинг янги турлари кириб келиш хавфи мавжуд», — дея таъкидлади Сергей Гордеев.
Бош прокурор Ниғматилла Йўлдошев прокуратура органларида рақамлаштириш жараёни ҳақида сўзлади. Унинг сўзларига кўра, янги технологияларни жорий этиш ҳисобига 100 млрд сўмга яқин маблағ иқтисод қилинган.
Унинг қайд этишича, Президентга прокуратура органлари фаолиятини рақамли трансформация қилиш тўғрисидаги фармон лойиҳаси ва унга тегишли «йўл харитаси» билан бирга «Рақамли прокуратура — 2030» стратегияси тақдим этилган.
«Бу лойиҳалар қонунчилик ижроси устидан замонавий назорат механизмларини жорий этиш ҳисобига қонун устуворлигини мустаҳкамлашга қаратилган. Фуқароларнинг мурожаатлари билан ишлашда сунъий интеллектдан фойдаланиш назарда тутилган, бу уларни ижро органларига тезкор йўналтириш ва кўтарилган масалаларни қисқа муддатларда ҳал қилиш имконини беради», — деди Ниғматилла Йўлдошев.
Унинг сўзларига кўра, прокуратуранинг маълумотлар базалари бошқа идоралар тизимлари билан тўлиқ интеграция қилинади, бу текширувлар устидан онлайн назорат механизмини яратишга ва жиноят ишларини электрон форматга ўтказишга имкон беради.
Тақдимотда, шунингдек, рақамлаштириш тергов ҳаракатларини тезлаштириши, инсон омилининг таъсирини камайтириши ва ходимларнинг масъулиятини ошириши қайд этилди.
Ҳуқуқни муҳофаза қилиш академиясининг Рақамли криминалистика илмий-тадқиқот институти ихтисослаштирилган маркази бошлиғи Хагани Гаджиев грантлар ҳисобидан криптоактив транзакцияларини таҳлил қилиш учун 30 га яқин дастурий мажмуалар сотиб олинганини, бу «блокчейн-таҳлил соҳасида илмий тадқиқотлар ўтказишга имкон беришини» таъкидлади.
450 та эксперт хулосаси ва тадқиқотлари ҳисобига 189 та кибержиноят фош этилган.
Кадрлар тайёрлаш учун 2026—2027 ўқув йилидан бошлаб академияда кундузги таълим шаклидаги киберҳуқуқ бўйича бакалавриат йўналиши очилади.
