Ўзбекистон Вазирлар Маҳкамаси 2025 йил 19 сентябрь куни автомобилларни экологик талабларга мувофиқлигини баҳолаш тизимини соддалаштириш тўғрисидаги қарорни қабул қилди.
Ҳужжатга кўра, Ўзбекистонга олиб кирилаётган М (йўловчи) ва N (юк) тоифасидаги янги ғилдиракли транспорт воситаларининг экологик сертификацияси тартиби бекор қилинади.
Эндиликда уларнинг экологик талабларга мувофиқлиги 2017 йилда тасдиқланган Ғилдиракли транспорт воситаларининг хавфсизлиги тўғрисидаги умумий техник регламент асосида баҳоланади.
Бу маълумотлар транспорт воситаси турини маъқуллаш ва мувофиқлик сертификатларида акс эттирилади.
Алоҳида қайд этилишича, электромобиллар (гибрид автомобиллардан ташқари) экологик баҳолашга тортилмайди.
Автомобилларнинг «Евро-4» ва ундан юқори экологик классларга мувофиқлигини текшириш қуйидаги тарзда амалга оширилади:
- мувофиқлик сертификатини расмийлаштиришда — аризага илова қилинган ҳужжатлар асосида;
- турни маъқуллашда — аккредитациядан ўтган лабораторияда чиқиндиларнинг меъёрларини таҳлил қилиш орқали, у мавжуд бўлмаганда эса — шунингдек, тақдим этилган ҳужжатлар асосида.
Экологик классни идентификация қилиш учун ишлаб чиқарувчи ёки ариза берувчи қуйидаги ҳужжатлардан бирини тақдим этиши керак:
- ишлаб чиқарувчи мамлакатнинг «Евро-4» дан паст автомобилларни ишлаб чиқаришни тақиқловчи қонун ҳужжатлари;
- ишлаб чиқарувчи ёки унинг вакилининг расмий хати;
- стандартга мувофиқлигини тасдиқловчи бошқа техник ҳужжатлар.
Шу билан бирга, агар транспорт воситаси «Евро-4» ёки ундан юқори талабларга жавоб бермаса, мувофиқлик тўғрисидаги ҳужжатларни бериш тақиқланади.
Эслатиб ўтамиз, Техник жиҳатдан тартибга солиш агентлиги 2025 йил 2 сентябрь куни ўтган кузда жорий этилган Пскент туманидаги полигонда автомобилларни синовдан ўтказиш амалиётини бекор қилган эди. Бу қарор 2025 йил 2 сентябрь куни Бош вазир ўринбосари Жамшид Ходжаев раислигида бўлиб ўтган Жаҳон савдо ташкилоти (ЖСТ) билан ишлаш бўйича Идоралараро комиссия йиғилиши доирасида қабул қилинган.
Ушбу йиғилиш баённомасида, шунингдек, расмий ва норасмий дилерларда, шунингдек, маҳаллий ишлаб чиқарувчиларда автомобиллар нархидаги фарқларни ўрганиш режалаштирилгани айтилган эди. Таҳлил якунлари бўйича нархларни тартибга солиш ва оптималлаштириш бўйича чора-тадбирлар ишлаб чиқиш режалаштирилган.
