Президент Шавкат Мирзиёев жамоатчилик вакиллари билан биргаликда мамлакатга олиб келинган янги юқори тезликда ҳаракатланувчи Hyundai Rotem поездида Самарқанддан Нарпай туманига етиб келди.
Тўқ рангли ойналарга эга оқ рангли таркиб Ўзбекистон байроғини эслатувчи мовий, яшил ва қизил рангли йўллар билан безатилган.
Саркарда Жалолиддин Мангуберди шарафига номланган ушбу поезд Ўзбекистонга етказиб берилиши режалаштирилган олтита таркибдан биринчиси бўлди. У еттита вагондан иборат бўлиб, тахминан 390 йўловчига мўлжалланган ва соатига 260 км тезликда ҳаракатланиш имкониятига эга. Поездда хизмат кўрсатишнинг учта — VIP, бизнес ва эконом класси кўзда тутилган.
Берилган маълумотларга кўра, узунлиги 175 метр бўлган таркиб Ўзбекистон иқлим шароитига мослаштирилган: у чангга, ҳароратнинг кескин ўзгаришига ва қум бўронларига чидамли. Яқин вақт ичида поездни Тошкент — Урганч — Хива йўналиши бўйича ишга тушириш режалаштирилмоқда, бунда йўл вақти тахминан 7 соатни ташкил этади (ҳозирда — 13 соатдан ортиқ).
Hyundai Rotem юқори тезликдаги электропоездларини етказиб бериш тўғрисидаги шартнома 2024 йил июнь ойида Жанубий Корея президентининг Ўзбекистонга ташрифи доирасида имзоланган эди.
Лойиҳанинг умумий қиймати 220,03 млн еврога баҳоланмоқда. Ўзбекистон 21,3 млн евро, «Ўзбекистон темир йўллари» компанияси — 13,5 млн евро ажратади, Корея Эксимбанки эса 185,18 млн евро эквивалентидаги корея вонида 40 йил муддатга, шу жумладан 10 йиллик имтиёзли давр билан кредит тақдим этади.
Қолган 5 та поездни етказиб бериш 2026–2027 йиллар давомида кутилмоқда.
Янги поезд учун узунлиги 465 км бўлган «Бухоро-Урганч-Хива» линияси электрлаштирилган.