Ўзбекистон Рақобат ва истеъмолчилар ҳуқуқларини ҳимоя қилиш қўмитаси Uzum Market компаниясига қарши инсофсиз рақобат факти бўйича YandexGo UB компаниясига нисбатан чора кўрди, деб хабар берди идора.
Бунга Uzum Market’нинг мурожаати асос бўлган. Қўмитанинг Махсус комиссияси ўрганиш натижасида Yandex Market’нинг телевидение ва ижтимоий тармоқларда намойиш этилган реклама ролиги «истеъмолчиларни чалғитувчи ва «Рақобат тўғрисида»ги қонун қоидаларини бузувчи ҳамда Uzum Market’нинг ишчанлик обрўсига путур етказувчи элементларни ўз ичига олганини» аниқлади.
Хусусан, қуйидагилар аниқланган:
- YandexGo UB рекламасидаги актрисанинг бинафшаранг либоси ва роликнинг биринчи кадрлари аввал Uzum Market компаниясининг видеоматериалларида фойдаланилган образларга визуал ва концептуал жиҳатдан ўхшаш;
- ролик бош қаҳрамони узум бошини кўтариб, «Бу маркетми?!» деб сўраганидан сўнг, саҳна иштирокчилари салбий муносабат билдирган;
- кейинчалик, «ажойиб маркет» сўзларидан сўнг, бош қаҳрамон узумга ишора қилиб, «Бу маркетми?» деб савол беради, бу эса томошабинда айнан Uzum Market ҳақида гап бораётгандек таассурот уйғотади. Бунга актриса: «Йўқ, бу бошқа маркет», деб жавоб беради, бу эса контекстда Yandex Market’нинг устунлигини таъкидлаган.
Махсус комиссия YandexGo UB’ни «Рақобат тўғрисида»ги қонуннинг 21-моддасини бузган деб ҳисоблади, чунки унда рақобатчи компания ёки унинг товари билан нотўғри таққослаш, товарга объектив тасдиқланган хусусият ёки таққослаш параметрларини кўрсатмасдан унинг устунлиги ҳақида таассурот уйғотадиган сўз ёки белгилардан фойдаланилган.
Шу билан бирга, Uzum Market томонидан бозор иштирокчиларига ёки истеъмолчиларга етказилган тўғридан-тўғри моддий зарарни тасдиқловчи асосли далил ва ҳужжатлар Махсус комиссияга тақдим этилмагани сабабли, комиссия вазиятнинг иқтисодий жиҳатдан таъсири паст деб баҳолади ва суд тартибида молиявий санкциялар қўллаш заруриятини кўрмади.
YandexGo UB компаниясига 1 ой муддат ичида кўрсатилган реклама ролигини барча оммавий ахборот воситаларидан олиб ташлаш, шунингдек, 2025 йил 14 августгача кўрсатмани бажарганини тасдиқловчи ҳужжатларни қўмитага тақдим этиш мажбурияти юклатилди.
Uzum Market шарҳи
«Ўзбекистонда электрон тижорат бозори жадал ривожланмоқда ва биз янги иштирокчиларнинг пайдо бўлишини олқишлаймиз — соғлом рақобатгина соҳани олға силжитади», — дейилади компания хабарида.
Шу билан бирга, Uzum рекламада ахлоқий меъёрларга риоя қилиш муҳимлигини таъкидлади. «Биз фойдаланувчиларни чалғитмайдиган ҳалол маркетинг усулларига риоя қилиш ўта муҳим деб ҳисоблаймиз. Биз учун вазиятни ҳуқуқий майдонда ҳал қилиш муҳим эди ва бу ягона ҳолат истисно бўлиб қолишига умид қиламиз», — дейилади шарҳда.
«Натижада, бозордаги барча компанияларнинг умумий мақсади бўлиши керак — онлайн харид маданиятини ривожлантириш, инфратузилмани кучайтириш ва Ўзбекистондаги одамларнинг ҳаётини осонроқ ва қулайроқ қилиш», — деди маркетплейс вакили.
