Хорижий Allied Biofuels корхонаси Хоразм вилояти ҳокимлиги билан ноль чиқиндили авиация ёқилғиси ишлаб чиқариш заводи қуриш учун ер ва сув ресурсларини тақдим этиш бўйича шартномаларни имзолади, дея хабар берди компания.
Лойиҳага киритиладиган инвестициялар 5,9 миллиард долларни ташкил этиши кутилмоқда. Завод Тупроққалъа туманида жойлашади. У Марказий Осиёдаги тўлиқ интеграциялашган биринчи биоқайта ишлаш корхонаси бўлади.
Йилига 382 минг тонна барқарор авиация ёқилғиси (SAF), 152 минг тонна электросинтетик SAF(e-SAF) ва 11 минг тонна қайта тикланувчи («яшил») дизел ишлаб чиқариш режалаштирилган. Охиргисининг ишлаб чиқарилиши 2 ГВт қувватга эга электролизёрлар ёрдамида олинадиган водород ҳисобига таъминланади.
Имзолаш маросими Хивадаги Халқаро инвестиция форуми доирасида компания раҳбари Альфред Бенедикт ва Хоразм вилояти ҳокими Жўрабек Рахимов иштирокида бўлиб ўтди.
«Лойиҳа Ўзбекистоннинг 2030 йилгача карбонат нейтраллигига эришиш бўйича миллий иқлим стратегиясига мос келади. Ноль чиқиндили ёқилғини саноат миқёсида ишлаб чиқариш транспорт ва саноатда қазиб олинадиган ёқилғидан фойдаланишни алмаштиришга, иссиқхона газлари чиқиндиларини камайтиришга ва мамлакатнинг яшил энергетикага ўтишини тезлаштиришга имкон беради», — дея таъкидлади компания.
Альфред Бенедиктнинг сўзларига кўра, келишув компания ва минтақа учун «тарихий лаҳза» бўлади. Вилоят ҳокими Жўрабек Рахимов лойиҳани амалга ошириш учун минтақа танлангани учун миннатдорчилик билдирди. У лойиҳанинг амалга оширилиши Хоразмнинг яшил энергетика маркази сифатидаги мавқейини мустаҳкамлашини, юзлаб иш ўринлари яратишини ва минтақа иқтисодиёти ривожига катта ҳисса қўшишини таъкидлади.
Allied Biofuels Ўзбекистонда 2025 йил июль ойида рўйхатдан ўтган. Унинг раҳбари Альфред Бенедикт айни пайтда Австралиянинг Allied Green Ammonia компаниясига ҳам раҳбарлик қилади. Апрель ойида Ўзбекистоннинг Хорижий инвестицияларни жалб қилиш агентлиги ушбу компания билан ҳамкорлик меморандумини имзолаган эди.
Ўшанда томонлар йиллик 800 минг тоннага яқин яшил мочевина, 350 минг тонна барқарор авиаёқилғи (SAF) ва 35 минг тонна «яшил» дизел ёқилғиси ишлаб чиқаришни назарда тутувчи яшил энергетика соҳасида лойиҳа ишлаб чиқишни режалаштираётганини таъкидлаган эди. Ўшанда хабар қилинганидек, лойиҳа 4 ГВтгача қайта тикланувчи энергия ва кунига 6000 тонна биомассадан фойдаланишни назарда тутган. Ўшанда инвестициялар ҳажми 5,5 миллиард доллар миқдорида режалаштирилган эди.
