Ўзбекистон ва Хитой йўл соҳасида ҳамкорлик қилишга келишиб олди, дея хабар берди Транспорт вазирлиги.
Ўзбекистон Автомобиль йўллари қўмитаси делегацияси Тяньцзинь шаҳридаги Шаҳар муҳандислик, лойиҳалаш ва тадқиқотлар институти раҳбарияти билан учрашув ўтказди. Хитойнинг энг йирик синов лабораториясига ташриф давомида томонлар йўл соҳаси учун инновацион материалларни биргаликда ишлаб чиқиш бўйича музокаралар олиб бордилар.
Учрашув якунлари бўйича ҳамкорлик шартномаси имзоланди, бу Ўзбекистон ва ривожланган хорижий давлат ўртасида йўл соҳасида ягона стандартлар тизимини яратиш, инновацион материалларни ишлаб чиқиш ва рақамлаштириш бўйича амалий ишларни бошлашга доир биринчи шу каби ҳужжат бўлди.
Таъкидланишича, йўл соҳасида янги технологияларни жорий этиш, замонавий нормативларни яратиш ва рақамли ечимларга ўтиш бўйича ишлар биринчи марта амалий жиҳатдан бошланади.
Аввалроқ автомобиль йўллари қўмитаси раиси Жамшид Турсунов Ўзбекистонда йўллардан фойдаланиш норма ва стандартлари эскирганини, бу эса «маблағлардан самарасиз фойдаланишга йўл очишини» айтган эди.
2024 йил ноябрь ойида Тошкент ҳокимияти ва Хитойнинг China State Construction Engineering Corporation (CSCEC) қурилиш корпорацияси қарийб 1 миллиард долларлик лойиҳалар бўйича келишиб олган эди.
Биринчи, қиймати 300 миллион долларлик лойиҳа доирасида Тошкентнинг йўл инфратузилмасини реконструкция қилиш режалаштирилган. Йўллар ва уларга тегишли объектларни модернизация қилиш, шунингдек, 200 дан ортиқ мутахассисни, жумладан геодезистлар ва транспорт муҳандисларини жалб қилиш кўзда тутилган.
Иккинчи лойиҳа йўл қурилиши соҳасида архитекторлар, лойиҳачилар ва муҳандисларни тайёрлаш бўйича қўшма корхона ташкил этишни назарда тутади.
Учинчи лойиҳа кўприкларни лойиҳалаш ва қуришга қаратилган. Қиймати 259 миллион доллар бўлган шартнома тирбандликларни камайтириш ва транспорт инфратузилмасини яхшилаш учун замонавий кўприкларни ишлаб чиқишни назарда тутади.
Бундан ташқари, 440 миллион долларлик замонавий турар-жой мажмуасини қуриш режалаштирилган. Мажмуа турар-жой бинолари, бизнес-марказлар, таълим муассасалари ва савдо зоналарини ўз ичига олади.
