Финландиянинг Wolt етказиб бериш сервиси 5 мартдан бошлаб Ўзбекистондаги фаолиятини тўхтатишини эълон қилди. Бу ҳақда мамлакатда 2024 йилнинг октябрь ойидан буён ишлаётган компания хабарида айтилади.
«Яқин ҳафталардаги устувор вазифамиз — ушбу жараённи имкон қадар оддий ва тушунарли қилиш: биз расмийлаштирилган буюртмаларни бажаришни, тўловларни қайтаришни ва кредитларни қайта ишлашни давом эттирамиз, қўллаб-қувватлаш хизмати эса очиқ қолади», — дейилади хабарда.
2014 йилдан бери мавжуд бўлган ва 30 дан ортиқ мамлакатда фаолият юритаётган компания ёпилиш ҳақидаги қарорни қийин деб атади.
«Ўзбекистон бозори шароитларининг ўзига хос хусусиятлари туфайли биз ўз стандартларимизга мувофиқ хизмат кўрсатиш даражасини барқарор қўллаб-қувватлай олмаслигимиз ҳақидаги хулосага келдик», — дея қайд этди Wolt.
Келажакда компаниянинг Ўзбекистон бозорига қайтиш режалари йўқ.
«Биз ҳамкорлар, мижозлар ва курьерлар учун барқарор ва сифатли сервис таъминлаш мақсадида ўз фаолиятимиз натижаларини мунтазам равишда баҳолаб борамиз. Компания ўсиши билан биз барқарор узоқ муддатли бизнес қуришимиз мумкин бўлган соҳаларга инвестицияларни йўналтириш учун ёндашувимизни қайта кўриб чиқдик», — деб баёнот берди компания.
2026 йил 5 мартдан бошлаб янги буюртмаларни қабул қилиш тўхтатилади, бироқ компания аккаунт ёки аввал расмийлаштирилган буюртмалар билан боғлиқ масалалар бўйича қўллаб-қувватлашни давом эттиради.
Фойдаланувчиларнинг аккаунтлари фаол қолади ва улардан Wolt ишлайдиган бошқа мамлакатларда фойдаланиш мумкин бўлади. 4 мартгача ишлатилмаган обуналар, кредитлар ва акциялар фойдаланувчининг тўлов усулига автоматик равишда қайтарилади.