16 майга ўтар кечаси Тошкентнинг Шимолий вокзали ҳудудидаги вагонларни таъмирлаш депоси ҳудудида катта ёнғин содир бўлди. Пойтахт ФВБга ёнғин ҳақида хабар соат 23:58 да келиб тушган.
Аланга бир неча километр узоқликдан кўринган. Яқин атрофдаги мавзелар аҳолиси кучли ис гази ҳидини сезганликларини хабар қилишган.
ФВБ хабарига кўра, соат 0:03 да воқеа жойига ўт ўчириш экипажлари етиб келган. Ёнғин соат 1:31 да локализация қилиниб, соат 2:48 да ўчирилган.
Ёнғин натижасида жабрланганлар йўқ. Бошқа тафсилотлар ҳозирча маълум қилинмади. Воқеа сабаблари аниқланмоқда ва зарар миқдори баҳоланмоқда.
