Тошкентда ўсмир йигит BMW M4 машинасида ЙПХ ходимини уриб юборганидан сўнг, Ўзбекистон Бош прокуратураси Uzbelas Performance тюнинг-ательеси раҳбари Асадбек Жумаевнинг резонансга сабаб бўлган видеоинтервьюсини ўрганиб чиқди. Унда Жумаев махсус сигналлар билан ҳаракатланган BMW автомобиллари (бири — рақамсиз) унинг компанияси томонидан техник хизмат кўрсатилганини тан олади ва қандай қилиб «кичик жарима билан қутулиб қолгани» ҳақида сўзлаб беради.
Бош прокуратура хабарида айтилишича, жиноят ишлари бўйича Мирзо Улуғбек туман суди 16 январь куни 2003 йилда туғилган Жумаевга нисбатан Маъмурий жавобгарлик тўғрисидаги кодекснинг 195-2-моддаси (ҳуқуқни муҳофаза қилиш органлари ходимларининг ўз хизмат вазифаларини бажариши билан боғлиқ видео ва фототасвирларини уларни обрўсизлантириш мақсадида тарқатиш) билан базавий ҳисоблаш миқдорининг 20 баравари, яъни 8,4 млн сўм миқдорида жарима жазосини қўллаган.
«Вазиятга объектив ҳуқуқий баҳо бериш мақсадида 2026 йил 26 февраль куни Мирзо Улуғбек туман прокуратураси томонидан Тошкент шаҳар судининг жиноят ишлари бўйича судлов ҳайъатига протест келтирилди», — дейилади хабарда.
«Юз сўминг бўлгунча, юзта дўстинг бўлсин»
Резонансли видеода рақамсиз ва «мигалка» ўрнатилган кулранг BMW X5 ҳайдовчиси ЙПХ инспекторининг ишораси билан тўхтаб, сўнгра тезликда қочиб кетгани, бошқа бир лавҳада эса ушбу тюнинг компаниясидан махсус сигналлар ўрнатилган BMW X7 чиқиб келаётгани акс этган кадрлар кўрсатилган.
Асадбек Жумаев интервьюда BMW иштирокидаги ЙҲҚ қоидабузарликлари акс этган видео пайдо бўлганидан кейин унинг олдига «қидирув»дан келишганини ва камералардаги ёзувларни кўрсатишни талаб қилишганини, аммо у «афсуски» буни қилишдан бош тортганини айтади. Шундан сўнг ИИБ ходимлари уни олиб кетиб, кўрсатма беришга «мажбурлашган». Унинг айтишича, кимдир бунинг учун 15 сутка олиши мумкин эди, лекин улар «10 та минималка миқдоридаги кичик жарима билан қутулиб қолишган».
Асадбек Жумаев ўзининг «оддий бўлмаган дўстлари кўплигини» таъкидлаб, «Юз сўминг бўлгунча, юзта дўстинг бўлсин» мақолини келтиради.
«Балки биз унчалик яхши бўлмаган иш қилгандирмиз, лекин мен бундан фахрланаман, чунки ҳеч бўлмаганда ўзимиз эслаб қоладиган ҳаётимизни яшаяпмиз», деб таъкидлади. Шу билан бирга, у бу ишларни атайлаб қилмаганини, гарчи видео интернетга чиқариш учун олинган бўлса-да, тан олади.
Интервью берувчининг «ёшлар бошқаларнинг рулда ўзини қандай тутаётганини кўриб, худди шундай йўл тутиши мумкинлиги» ҳақидаги фикрига жавобан, у шундай дейди: «Бизнинг ёш авлод наркотиклар билан шуғуллангандан кўра, машиналарга қизиққани яхшироқ». Видео кўрувчиларга маслаҳати эса: «Ўзингизга ёққан ишни қилинг — ҳаммадан зўр бўласиз».
«Бу ДАН ходимининг ўрнида бизнинг ота-онамиз бўлиши мумкин эди»
ЙПХ инспектори иштирокидаги авария муносабати билан ИИВ томонидан эълон қилинган видеода Асадбек Жумаев ЙТҲга алоқаси йўқлигини, фақат автомобилларни тюнинг қилиш ва уларга хизмат кўрсатиш билан шуғулланишини баён қилади.
ИИВ ушбу роликни «ижтимоий тармоқларда пиар қилиш мақсадида мақтаниш учун яратилган паст сифатли контент» деб атади.
«Instagram ва бошқа нашрларда биз ёшлар орасида шу каби нарсаларни тарғиб қилаётганимиз ҳақида хабар берилди. Биринчи навбатда айтаманки, биз нотўғри иш қилдик. Интервьюни чиқаришдан олдин унинг монтажини текширишимиз керак эди», — дейди ателье раҳбари.
«BMW X5 ва X7 автомобилларига келсак, мен ушбу машиналар бизнинг тюнинг-ательедан чиқиб кетаётгани акс этган видеоларни жойлаган эдим, уларда бўйсунмаслик ва, айтиш мумкин бўлса, „мазах қилиш“ акс этган бўлиб, буни шундай ҳаракатлар тарғиботи деб баҳолаш мумкин», — деб тан олади.
«Менга 201-1-модда (қонунчилик ҳужжатларини ижро этмасликка ёки бузишга оммавий даъват қилиш — таҳр.) бўйича 60 та „минималка“ миқдорида қонуний жарима ёзилган эди. Интервьюда эса гўёки бор-йўғи 10 та минималка жарима солинганини айтганман — бу шунчаки пиар учун мақтаниш эди», — деди Асадбек Жумаев.
«Сўзлар контекстдан юлиб олингани сабабли, бу тарғибот каби кўринди. Биз буни тарғибот учун қилмаган эдик. Бунга енгилтаклик билан ёндашганимиз сабабли ҳозир муаммоларга дуч келдик. Кўриниб турибдики, ҳар қандай тарқатилган нотўғри маълумот учун жавобгарлик бор экан», — деб таъкидлади.
«Ушбу ДАН ходимининг ўрнида бизнинг ота-онамиз бўлиши мумкин эди. Барчадан узр сўраймиз», — дея якунлади.