Тошкентдаги Юнусобод дехқон бозори ўрнида уч қаватли замонавий комплекс қурилади. Янги лойиҳага кўра, бозор экобозорга айлантирилиб, у ерда савдо маркази, офислар, ерости автотураргоҳи ва томда ресторанлар ҳамда яшил ҳудуд барпо этилади. Президент ушбу қурилишни бозорни тўхтатмай, босқичма-босқич ташкил этишни топширди.
Янги лойиҳа ҳақида
Ўзбекистон Президенти Шавкат Мирзиёевга 2024 йил 11 декабрь куни Юнусобод бозорини модернизация қилиш лойиҳаси тақдим этилди. Президент матбуот хизматига кўра, мазкур бозор ҳар доим гавжум, аммо уни кенгайтириш учун майдон етарли эмас. Шу сабабли, бозорни замонавий тарзда, «баландликка» ривожлантириш, савдо ҳудудларини кўпайтириш ва инфратузилмани яхшилашга қарор қилинган.
Янги иншоотнинг хусусиятлари
Лойиҳа доирасида бозор яқинида қўшимча савдо маркази ва заргарлик уйи қурилади. Энг муҳими, барча бинолар остида 1000 дан ортиқ автомобиль сиғимига эга ерости автотураргоҳи ташкил этилади. Ушбу лойиҳа 4-5 мингта янги иш ўрни яратишни назарда тутади.
Туркиялик архитекторнинг «Ўзбекистон 24» телеканалига берган интервьюсида айтилишича, янги иншоотнинг умумий майдони 20 минг квадрат метрни ташкил қилади. Бозорнинг марказий қисми «экобозор» форматида бўлиб, атрофида турли дўконлар жойлашади. Болалар учун батут маркази очиш режалаштирилган.
Томдаги яшил ҳудуд ва ресторанлар
Янги мажмуанинг томида ресторанлар, дарахтлар ва буталардан иборат яшил ҳудуд ташкил этилади. Бу нафақат бозорга келувчилар учун қулайлик яратади, балки шаҳарнинг экологик муҳитига ҳам ижобий таъсир кўрсатади.
Бозорнинг юқорига кўтарилиши
Апрель ойида президент пойтахт кенгаши сессиясида мазкур бозорнинг олти қаватгача бўлиши мумкинлигини таъкидлаган эди. Янги концепция бозорни нафақат кўркам ва замонавий, балки қулай инфратузилмага эга марказга айлантиришни мақсад қилган.
