2024 йил 3 декабрь куни Тошкентнинг Учтепа тумани жиноят ишлари бўйича суди автобусда йўловчи қизнинг юзига туфлаган 32 ёшли эркакка нисбатан маъмурий ишни кўриб чиқди.
Ҳодиса 11 ноябрь куни Учтепа туманида ҳаракатланувчи 146-автобусда рўй берган. Жабрланувчи қиз онаси билан ишдан қайтиб, автобусда ҳаракатланаётган эди. Ичкарининг иссиқлиги сабаб у свитерини ечиб, тушишидан олдин қайта кийган. Шу пайтда қаршисида ўтирган Бахтиёржон Ортиқов унга нисбатан “Бу жой кийим алмаштириш жойими?” деб бақириб, ҳақорат қилган ва унинг юзига туфлаб, жамоат тартибини бузган. Бу ҳақида суд қарорида таъкидланган.
Ҳуқуқбузар ўз айбини қисман тан олган ҳолда қизнинг ҳаракатини “салондаги йўловчилар диққатини ўзига тортди”, деб баҳолаган ва шунга кўра танбеҳ берганини айтган. Аммо у қасддан туфламаганини, тез гапирганлиги сабабли “сўлаклар” тасодифан чиқиб кетиши мумкинлигини даъво қилган.
Суд жараёнида у содир этган ҳаракатидан афсусланганини билдириб, жабрланувчидан узр сўрашини айтган ва жазони енгиллаштиришни сўраган.
Шу билан бирга, ижтимоий тармоқларда тарқалган видеода эркак жабрланувчининг онаси билан баҳслашаётгани акс этган:
“Бу нима дегани? Бу ерда ҳижобдаги аёллар бор, оналаримиз бор. Сиз шу инсоннинг онасимисиз? Нега тўғри тарбия бермадингиз? Болангиз тарбиясиз. Болангиз тарбиясиз! Кейинги бекатда тушиб қолинглар! Сиз ҳам тарбиясизсиз, агар болангизга шундай тарбия берган бўлсангиз. Бундай тарбия берганингиз учун сизга ҳам туфлаш керак эди! Ҳозир тушиб қолинглар, э! Бу ерда оилали одамлар бор”, — деган у.
Шунингдек, эркак қизга “У ички кийимигача ҳамма кийимларини ечган”, деб айб қўйган, лекин бу айблов нотўғри бўлиб, у фақат футболкада бўлган. “Sevimli” телеканалига берган интервьюсида эса эркак “У курткасини ечди, лекин ички кийимгача эмас. Бироқ беҳаё ҳаракат қилди”, деб таъкидлаган.
Жабрланувчи суддан эркакка қонунчиликда кўзда тутилган энг оғир жазони тайинлашни сўраган.
Суд ҳуқуқбузарни Маъмурий жавобгарлик тўғрисидаги кодекснинг 183-моддаси (майда безорилик) бўйича айбдор деб топиб, унга 10 сутка маъмурий ҳибс жазосини тайинлади. Шунингдек, у махсус қабулхонада сақлаш харажатлари учун 562.5 минг сўм тўлаши керак.
