Тошкент метрополитенининг «Буюк ипак йўли» бекатида ногиронлиги бўлган шахслар учун электрон кўтаргичлар ўрнатилди. Бу ҳақида Ўзбекистон Транспорт вазирлиги матбуот хизмати хабар берди.
Бунгача шундай кўтаргичлар «Халқлар дўстлиги» бекатида пайдо бўлган эди. Транспорт вазирлиги маълумотига кўра, йил охиригача яна 16 та метро бекатида бундай қурилмалар ўрнатилади.
Бундан ташқари, «Буюк ипак йўли» бекатида санитария хоналари очилди. Жорий йил давомида яна 8 та бекатда шундай хоналар фаолият бошлайди. «Амир Темур хиёбони», «Пахтакор» ва «Беруний» бекатларида эса бу ишлар якуний босқичда экани қўшимча қилинди.
2025 йил 31 март куни «Мустақиллик майдони» бекатида янги эскалатор фойдаланишга топширилди. «Пахтакор» ва «Ҳамид Олимжон» бекатида ҳам эскалаторлар ўрнатиш ишлари якунланмоқда, деди вазирлик.
2024 йил ноябрда Тошкент метрополитени 9 та бекатда ҳожатхона ва чақалоқларга мўлжалланган хоналар очиш режалаштирилаётганини маълум қилган эди. Бундай санитария хоналари илк бор 2022 йил февралда тажриба тариқасида «Чилонзор» бекатида ишга туширилган.
